Jerusalem, Risaw:
Ki shipai Israel ha ka Sngi U Blei ki la iathuh ba 5 ngut ki shipai Israel ki la kyllon iap hapdeng ka jing-iakhun bad ki lehnoh Hezbollah sha ka thaiñ Shathie jong ka Lebanon. Kat haduh mynta ka jingiap jong ki shipai Israel naduh ba leit tur sha Lebanon ka la kiew sha ka 37 ngut baroh.
Namar la ong ba ka Hezbollah ka la sdang ther ‘namding sha Israel naduh ka 8 tarik jong une u Risaw, kum shi bynta ban ai jingkyrshan ia ka kynhun lehnoh Hamas na Gaza.
Kumjuh ruh ka Israel ka la leit thombor ia ka Lebanon ha shwa kaba kut jong u bnai ba la dep bad ha une u bnai ka la sdang wat ban leit tur syndon sha Lebanon da kaba phah ia ki shipai ryngkew jong ka ban leit khynra bad leit hiar thma sha kito ki bynta khappud jong ka Lebanon mar khap bad ka Israel.
Kane ka jingiakynad hapdeng ka Israel bad ka Hezbollah ka la wanrah ia ka jingiap jong kumba 1,600 tam ki mynsiem briew naduh ba ka Hezbollah ka la ia pyni bor bad ka Israel naduh ka 23 tarik u Nailur.
