Jerusalem, Risaw:
Ka tnat shipai Israel ha ka Lah Sngi U Blei ka la ïathuh ba ka la ïoh kem ïa kumba 100 ngut ki dkhot ka lehnoh Hamas na ka jingleit khynra sha ka hospital ha Kamal Adwan kaba don sha ka phang Shatei jong ka nongbah Gaza.
Hynrei na ka liang ki heh ka tnat ka koit ka khiah jong ka Hamas ha Gaza, ki la kyntait ïa ka jingdon ki dkhot lehnoh ha katei ka hospital, ha kaba ki shipai ka Israel ki la leit ban rung bad khynra hapoh katei ka jaka ha ka Sngi Thohdieng sngi bad miet bad ki la mih noh pat na katei ka jaka ha ka Sngi Saitjaiñ.
Kumta, la ong ba ki shipai Israel ki la shu ai jingkheiñ kyllum ba ki la don kumba 100 tam ki dkhot jong ka Hamas ba ki la ïoh bat bad kem katba ki dang shong rieh ha katei ka hospital. Na katei ka hospital, la lap ruh ïa ki tiar ïakhun naduh ki suloi, ki bom kawang kti bad kiwei de ki kot ki sla, wat ki pisa kiba la thmu ban pynbit-pynbiang ïa ka jingdonkam jong ki Hamas ha ka jingïakhun thma bad ka Israel.
Katba, ka tnat ka koit ka khiah jong ka Gaza ka la kynnoh ba ki shipai ka Israel ki la rah bad kem noh ïa shibun ngut ki nongsumar bad ki nongtrei jong katei ka hospital, ki bym shym la don jingïadei eiei bad ka lehnoh Hamas hynrei kiba long tang ki ‘riew paidbah, kiba kit ia katei ka kam paidbah ha katei ka jaka sumar.
Namar ka Israel ka la ong ba ki don tang katto- katne ngut na kitei ki lehnoh ba la ïoh kem, kiba la leh ak kumba ki dei ki doktor lane ki dkhot nongtrei jong katei ka jaka sumar.
Katkum ki durkhih bad ki dur ba la ïoh ring na katei ka jaka, la ïohi ïa katto-katne ki jing julor ha katei ka jakasumar hadien ba ki shipai ka Israel ki la mih noh na katei ka jaka ha ka Sngi Saitjaiñ.
