Shillong, Risaw 30
Ka Maraikaphon Youth Club ‘A’ ka la long sa kawei pat ka kynhun kaba la lah ban pynthikna ban ïoh rung sha ka final ha ka lympung ïalehkai U-14 Football Tournament 2024 ba la pynïaid da ka Maraikaphon Youth Club.
Kane ka la wan urlong hadien ba ka la lah ban pynliem biang sa shisien pat ïa ka Seng Samla Mawmluh da 1-0 kol ha ka semi final (2nd leg) na ka bynta ban tam da 3-0 ha ka aggregate, ha ka Sngi Balang ha madan Maraikaphon kaba ha Sohra.
Wat la ka MYC ka la lah ban pynliem teng ïa ka SSM da 2-0 kol ha ka semi final (1st leg), pynban ha kane ka jingïakhun jong ka wat ba ar ka la long kaba ïakhaid bha ha ka rukom ïalehkai. Kumta dei ha ka minit kaba 14 ba ka MYC ka la ïoh ban pynkhih jar nyngkong eh lyngba u Jayson Dohling.
Kane ka shi kol ka la ïai neh haduh kaba kut jong ka kylla step bad wat haduh kaba kut jong ka jingïalehkai ka Seng Samla Mawmluh kam shym la lah ban pynphai bad ka la hap ban mad biang ïa ka jingshah rem ha kane ka lympung.
Lyngba kane ka jingjop ka MYC kan pynkhreh ban ïaknieh ïa ka nam lahduh pyrshah ïa ka Mawreng Jr. Academy ha ka final kaba la buh ban pynlong ha ka 9 tarik u Naiwieng.
