Jowai, Naiwieng 01
Ka long ka khubor kaba sngewtynnad bad sngewsarong ba uwei na ki khun ka Rilum Jaiñtia uba tip kum u Maimai Laloo ba shong ba sah ha Loompyrdi Iongpiah, Jowai, wat hapdeng ka jingtynjuh ba u ïa shem ha ka jingim u la lap ïa ka lynti kaba thymmai kata ka jingieit ïa ka jingïalehkai bad ka jinglong shlur kaba la pynlong ïa u ban ïeng ha la ki jong ki kjat bad ban ïarap ïa kiwei.
U Maimai u dei u khun ka Kong Rila Laloo bad (L) Balan Lakiang. U Maimai u dei u nongïalehkai ïakhun-kti bad wat la u long uba thlun bad u bym lait kren u don pat ka sap kaba kyrpang ban ïarap ïa kiwei pat ki briew kiba pang ba shitom bad duna dkhot met.
Ka jingim jong u kam kut tang ha ka jingïalehkai bad kane ka sap jong u ka long ban ïarap ïa kiwei da kaba shna ïa ki kti ki kjat artificial ba kin ïoh biang ban ïaid ban ïeng. Ïa kane ka kam shna kti shna kjat ïa ki briew ki ba pang ba shitom ka dei kaba la tip kum ka Prosthic and Ortholic kaba u la ïoh jinghikai pyntbit na Tripura. U trei mynta kum Assistant Prosthetics & Orthotics ha Civil Hospital ïalong.
Haba phai sha ka jingim ïalehkai jong u, u la lah ban wanrah burom ïa ka ri India lyngba ka Asian Arm-Wrestling Cup kaba la long ha Mumbai.
U Maimai naduh ba u dang khynnah u sngewtynnad ïa ka kam ïalehkai sports, hynrei ha ki khyndiat snem u la pynbyrngia ïa ka por kyrpang ha ka Weightlifting bad Arm Wrestling kat haduh ba u la ïohlad ban mihkmat ïa ka jylla kumjuh ïa ka ri India ha ki kyrdan ïakop bapher bapher ba la pynlong hapoh ka Ri kumjuh shabar ka Ri India.
Ki jingïakop ïakhun kti kiba kham paw kiba u ïashim bynta ki long ha ka 27th Annual State Arm-Wrestling Championship, ka 40th National Arm-Wrestling Championship kaba la long ha Nagpur ha u snem 2016 bad ka National Arm-Wrestling Champion-ship kaba la long ha Jammu Kashmir ha u snem 2023.
Ha u snem 2024 pat u Maimai u la ïohlad ban ïashim bynta ha ki ar tylli jingïakop bad mihkhmat ïa ka Jylla kumjuh ïa ka ri India, kita ki long ka National Arm-Wrestling bad Para Wrestling Championship kaba la long ha Maharashtra bad ka Asian Arm-Wrestling Cup kaba la long ha Mumbai naduh ka 25 tarik haduh ka 27 tarik Risaw 2024.
Ha kine ki jingïakop ba u ïashim bynta, sngewsarong ban ïathuh ba u Maimai u la wanrah nam bad burom ïa ka jylla bad ka ri da kaba ïoh ïa ka takma rupa ha baroh ar tylli ki jingïakhun kti.
Ka bor met kaba khlaiñ jong u bad ka jingshlur u la lah ban pyndep ïa shibun ki Short Term Course Training kynthup ïa ka Painting lyngba ka Jeebon Roy Creative Art Academy bad kiwei kiwei kiba u sngewtynnad ban trei.
Haba pynkut ïa ka khubor, u Maimai kum u briew ba don ka sap bad sngewtynnad ïa ka Arm-Wrestling, u don ka jingthrang jing-angnud ban wanrah nam bad burom ïa ka ri India ha ki jingïakop kiba kham heh jong ka pyrthei. Kumta u ong ba nangne shakhmat un nang trei shitom shuh shuh khnang ba un lah ban pynurlong ïa ka jingangnud ka jong u, kaba long ka burom kaba khraw ïa u hakhmat ka pyrthei.
Kumta une u nongïalehkai u phai khmat sha ki bor ba dei peit ban ïarap ïa u namar ba haduh mynta mynne um ïoh satia ïa ka jingkyrshan na ki bor sorkar.
