New Delhi, Naiwieng:
Ha kaba ïadei bad ka jingbteng jong ka jingïakynad ha khappud, ki shipai ka tnat Indian Army ki la sdang ban pynlong ïa ka jingpahara ha ka thaiñ Demchok jong ka thaiñ Mihngi jong ka Ladakh naduh ka 1 tarik, Naiwieng.
Kane ka jingpyntreikam ka la long hadien ka jingïasoi soskular ba dang shen hapdeng ka India bad China halor ka jingthmu ban lah ban weng ïa ki jingeh ha ki bynta jong u Line of Actual Control (LAC). Katkum ki khubor ba la ïohlum, la ong ba ki heh shipai ki la pyni ba ka jingpahara ha ka thaiñ Demchok kan sa long biang kumba ka long hashwa u bnai Ïaïong jong u snem 2020.
Nalor kane, la khmih lynti ba ki jingtreikam ha ka thaiñ Depsang kin sdang noh shen, kaba pyni ïa ka jingwanphai biang sha ka jinglong kaba rim.
Ki shipai India bad China ki ïashim bynta ha ka jingïasam jingbam thiang ha ki jaka khappud bapher bapher, kynthup ïa kito kiba don ha ka thaiñ Mihngi jong ka Ladakh, ha ka Diwali.
“Ka jingïasam jingbam thiang hapdeng ki dkhot jong ki shipai jong ka India bad China ka la long ha ki katto katne ki jaka khappud ha shilynter ka LAC ha ka sngi ba la rakhe lehkmen ïa ka Diwali,” la ïathuh ka tyllong khubor kumba la kren da u heh shipai.
Kane ka jingleh ka la jia tang shisngi hadien ba baroh ar tylli ki ri ki la jop ban pynïakhlad ïa ki shipai na ki ar tylli ki jaka ba don jingïakynad-ka Demchok bad ka Depsang Plains-kaba pynpaw ïa ka jingkylla ha ka jingïadei hapdeng ki arliang mamla.
Kum ka rukom ba dei ban long, ki shipai India bad China ha ki por ba la dep, ki ju ïa ai jingbam thiang markylliang bad ïa ai khublei ha ki katto katne ki jaka khappud ha shilynter ka LAC, kynthup ha ka thaiñ Mihngi jong ka Ladakh, ban rakhe ïa ki jinglehkmen bad kiwei kiwei ki jingïalang kiba kongsan.
U Rajnath Singh, uba long u Myntri jong ka tnat ïada ri, u la pynbna ba baroh ar tylli ki ri – ka India bad ka China – ki la lah ban pynkynriah jaka ïa kiba bun ki shipai ba hakhmat eh jong ki, sha jngai na u pud u sam ba don jingïakynad.
“Ka rukom pynïakhlad ka la jan kut,” ong u Rajnath Singh, da kaba pynpaw ïa ka jingkyrmen kaba peitthuh ha kaba ïadei bad ka jingïadei ha ka lawei hapdeng ki ar tylli ki ri.
U Foreign Secretary u Vikram Misri dang shen u la pyntikna ba ïa ka jingïateh kaba thymmai la dep ban ai ïa ka rai bakhatduh hapdeng ka India bad ka China hadien ba la wanrah ïa ki jingïakren ïasngewthuh jingmut kaba la ïaid da bun taïew.
Kane ka jingïateh ka kren kyrpang ïa ki jingpahara ki shipai bad ka jingpynïakhlad ïa ki shipai ha shilynter u LAC ha ka thaiñ Mihngi jong ka Ladakh, da kaba thmu ban pynbeit ïa ki jingeh kiba la sahkut naduh ba ki jingeh ki la nang jur ha u snem 2020.
Ka jinglong tynrai jong kine ki jingjia ka dap da ka jingeh, khamtam hadien ka jingïaleh kaba jur ha ka them Galwan Valley ha u, Jymmang jong u snem 2020, kaba la long kawei na ki jingïaleh kaba jur tam hapdeng ki shipai ha ki phew snem.
Ki jingïakynad ha khappud kiba dang ïaid shakhmat ki la pynjynjar ïa ka jingïadei hapdeng kine ki ar tylli ki ri, kiba la mad ha ka khana pateng ïa ki por jong ka jingïatreilang bad ka jingïakynad.
Katba ka jinglong jingman ka nang kiew, ka jingpyntreikam kaba jop ïa ka jingïateh kular ban ïakhlad kan long kaba kongsan ha kaba pynsuk ïa ka thaiñ bad ban pynroi ïa ka jingïadei kaba kham bha hapdeng ka India bad China.
