Washington, Naiwieng:
Ka tnat FBI ha kine ki khyndiat sngi ka la maham ia ka US halor ka jingma na ki kam thombor jong ki lehnoh ha ki sngi ba pynlong ia ka jingthep vote na ka bynta ka ilekshon President jong katei ka ri.
Kane ka jingmaham na ka Federal Bureau of Investigation (FBI) ka long ruh ha kum kane ka por ba ki bor pynïaid ka nongbah Georgia ki la pyntip ba ki la ioh jingtip halor ka jingthmu leit buh bom ha ki jaka thep vote ban pyn pulom ia katei ka jingthep vote paidbah ha ka Sngi Ba-ar. Hynrei, tad haduh ba la khang noh ia ka jingthep vote ha katei ka Sngi Ba-ar, ym shym la don kano- kano ka jingma ne ka jingjia ba sngewsih ia ki paidbah nongleit thep vote.
Namar ba ka ilekshon President ha US ka long kaba heh bha, kumta ki bor pynïaid ka US ki la phah shibun bah ki shipai bad ki bor pahara ki ban leit ban ap pahara khnang ba kan ym don kano- kano ka jingma ne jingpynthud ia ka jingleit thep vote ki paidbah ha katei ka sngi.
Ia kitei ki jingbyrngem la iohsngew na ki kynhun lehnoh ba buhrieh jong ka Russia bad kumta ka FBI khlem da pynslem ka la pyntip bad maham lypa ia ki paidbah bad ki bor pahara ba kin long ba la pynkhreh lada kum kitei ki jingjia kin wan jia ha katei ka sngi ba thep vote.
Namar la ong ba u Secretary of State jong ka Georgia- u Brad Raffensperger u la iathuh ba ki bor pynïaid ki la ioh jingtip halor ki jingthmu thombor jong ki lehnoh ha ki 2 sngi ba la pynbeit ban pynlong ia ka jingthep vote na ka bynta ka ilekshon President jong ka US.
