Washington, Naiwieng:
U President ka United States, u Joe Biden, ha ka Sngi Balang u la phone sha u Donald Trump ban ai khublei ia u halor ka jingjop ia ka ilekshon President ha kane ka sien bad u la khot sngewbha ruh ia utei u nongialam ka Republican sha ki jing-ialang ki ban sa long shen na ka bynta ka bha- ka miat jong ka ri bad ka jaitbynriew baroh kawei.
Ha katei ka jingiakren phone bad u Trump, u Biden u la pynpaw ka jingkloi jong u ban iatrei lang bad utei u nongialam bathymmai ka US na ka bynta ka jingbha bad ban kyntiew ia ka bha-ka miat hapoh ka ri.
U Biden u la ioh ruh ban iakren bad ka kyrtong ïakhun pyrshah ia u Trump ha kane ka ilekshon – ka Kamala Harris, kaba long ruh ka Vice- President ba mynta jong ka United States. U la ong ba wat la ka Harris kam lah ban long ka President jong ka US ha kane ka sien, hynrei ka por ka dang bun bad ka lah pat ban ioh bat ia kane ka shuki ha ki snem ki ban wan. Wat la katta, u la ong ba ka Harris ka la long pat kawei na ki nongialam ba kongsan jong ka US bad ka la trei shitom ban wanrah ia ka bha- ka miat na ka bynta ki paidbah jong ka baroh shi katta ki snem.
