New York, Risaw:
Ka Bowen Wan, kaba dei ka Software Engineer, ka la duh noh ïa la ka jong ka jingim, tang namar ka jingshaniah tylli bad jingbud ïa ki jingbatai jong ka juk stad thymmai (Artificial Intelligence) ban ïa ki doktor kiba la dep batai shai ïa ka kumno ban sumar ïa ka koit- ka khiah jongka.
Katkum ki khubor, la iathuh ba ki kmie ki kpa jong katei ka briew 31 snem ka rta, ki la mudui pyrshah ïa ka OpenAI bad CEO Sam Altman, da kaba kynnoh ba ka jingpyniaid bym biang kaba la ai da ka ChatGPT, ka la wanrah ïa ka jingiap jong ka khun jongki.
Katkum ka khubor, katei ka briew kaba long ka nongshong shnong jong ka Seattle, ka la khlad noh ha u Rymphang hadien ba ka la pynduna suki suki ïa ki dawai kiba ka ju dei ban dih katkum ka jingbthah jong ki doktor bad la ong ba ka la bud pynban ïa ki jingbthah bad jingai jingmut bad ka por por ba la buh da ka AI.
La ong ba ka Wan ka dang kren ïa u kpa jong ka lyngba ka jingiakren phone, ha kaba, kynsan kynsan ka la sangeh ban kren bad ka la kem pang kynsan. Hadien katto- katne sngi, haba ka la jah bad kam shym rah shuh ïa ka phone jong ki bahaiing- bahasem jongka, ki kmie ki kpa jong ka ki la kyrpad ïa kiwei pat ki briew ban leit iarap pyn peit bad ban wad bniah shaphang jongka.
Kawei ka paralok ka la leit sha ka jaka sah jongka bad ka la lap ïa ka ba ka la thiah iap; Ki kmie ki kpa jong ka, kiba sah ha China, ki don ha ka video call, ha ka por ba la lap ïa ka hangta bad ki dap da ka jinglyngngoh halor katei ka khubor bad kim lah ban sngewthuh ïa kaei kaba la jia.
Hadien la pyntip ba ka khun jongka, ka la khlad noh namar ka jingbym shim khia jongkahalor ka jingthud ha ka koit- ka khiah jongka bad ka la bud pynban ïa ki jingbthah jong ka juk stad AI ba mynta.
