New Delhi, Naiwieng:
Ka Bharatiya Janata Party (BJP) ha Maharashtra ka la beh noh ïa ki 40 ngut nongbud bad kumjuh ki nongïalam na ka seng ha ki 37 tylli ki Assembly konstitwensi. Kane ka jingjia ka la long hadien ka jingshah beh jong 30 ngut ki nongïalam ba pyrshah seng ha Jharkhand.
Kane ka la jia hapdeng ka por ba ka seng BJP ka dang ïaleh kat lah kat ïai ban khanglad ïa ka jingphet seng jong ki nongïalam jong ka ha Jharkhand, bad kumta ha ka Sngi Ba-ar ka seng ka la beh noh ïa ki 30 ngut nongïalam ba pyrshah seng halor ka jingleh bym kohnguh bad ka jingleh pyrshah jong ki ïa ki kyndon jong ka seng bad pyrshah ruh halor ka jingpynrung kyrteng jong ki kum ki kyrtong ban ïakhun ha ka ilekshon Assembly.
Kum shi bynta ban leh ei-ei halor ka jingbthah jong u heh nongïalam jong ka seng BJP ha ka jylla u Babulal Marandi, u General Secretary jong ka seng bad MP u Pradeep Verma u la beh noh ïa ki nongïalam ba pyrshah seng na ka bynta 6 snem.
Ki la don palat 35 ngut ki kyrtong ba la pynbna da ka BJP ha Jharkhand kiba leh khlieh armaloi ha kaba kane ka la wanrah ïa ka jingduh jingkyrmen ïa ki para dkhot ha ka seng. “Ka la don ka jingartatien ban shaniah ïa ki hapoh ka seng, ha kaba kane ka la pynbor ïa kiba bun ki dkhot ka seng ba kin mih noh bad ban leit sha ka JMM ne ka Congress”, la ong u nongïalam ka seng.
Ha kane ka kynti ba mynta, ki nongbud bad ki nongïalam jong ka seng BJP ha Maharashtra ki la shah beh noh namar ba kim shym bud ryntih ïa ki kyndon bad pyrshang ban pynpait ïa ka seng BJP. Kane ka jingpynibor da ka seng BJP ka la long hashwa ban pynlong ïa ka ilekshon Assembly ha ka 20 tarik, Naiwieng.
