Moscow, Naiwieng:
U President ka Russia, Vladimir Putin bad u President bathymmai jong ka US, Donald Trump, ha ka Sngi Palei ki la pynpaw ia ka jingpynkhreh ban iakren haba iadei bad ka thma jong ka Russia ha Ukraine. Kane ka long hadien ba utei u nongialam barim ka United States, u la jop biang ia ka ilekshon President sa shisien pat ha une u snem.
Kumta, u Putin ha ka Sngi Palei u la ong ba ha kane ka kynti, u shim ka kabu ksiar ban ai khublei kyrpang ia utei u nongialam jong ka US halor ka jingjop jong u ia katei ka ilekshon ha kane ka sien.
Haba la buh jingkylli pat ia u Putin la u kloi ne em ban iakynduh bad ban iakren bad u Trump haba iadei bad ka thma ha Ukraine, u Putin u la pyntip ba u long ba la kloi ban iakren bad u Trump haba iadei bad kane ka bynta.
Kumjuh na ka liang jong u Trump, u la pynpaw ia ka jingkloi ban iakren bad ka Russia bad ruh bad ka Ukraine, na ka bynta ban wanrah biang pat ia ka shongsuk- shongsaiñ ha ka pyrthei kumba ka long ha ki por ka jingsynshar ka sorkar jong u ha ki snem ba la leit.
U Trump ha ka sngi ba la leit, u la ong ruh ba u la ioh ban iakren bad ki 70 ngut ki nongialam ka pyrthei hynrei dei tang ia u Putin ba u khlem pat ioh ban iakren, namar ba u Putin u kyrmen ia ka Harris ba kan jop.
