Shillong, Naiwieng 08
Ka Jammu and Kashmir ka la donkam shi kynta ha ka step jong ka sngi balai ban pyntikna ïa ka jingjop da 7 wiket pyrshah ïa ka Meghalaya ha ka jingïalehkai jong ka Elite Group-A ha ka Ranji Trophy Elite ha ka Sngi Thohdieng ha MCA kaba ha Polo.
Da kaba bteng biang na ka 16/1 ban beh ïa ka 75 na ka bynta ka jingjop, ka J&K ka la shah pynhap 2 wiket. U nongkawang bol ka Meghalaya u Akash Kumar Choudhary u la ïoh 2 wiket bad ai 36 ron.
U Akash u la pynlong ïa u Ahmad Omar Banday ban ïoh kem hapdeng ka jingïalehkai shwa ba u Roshan Warbah un ïoh kem ïa u Abdul Samad, uba dang pyrshang ban kamai bun run.
U Dippu Sangma (1/12) u la lah ban pynhap wiket hynnin ka sngi. U Auqib Nabi jong ka Jammu la shah jied ïa ka Player of the Match hadien ba u la ïoh ban khur 10 wiket.
Wat la ka dei ka jingshah rem ha ka sien basaw lynter, hynrei kane ka jingïakhun ka la long sa kawei pat ka sien jam ïa ka kynhun ïalehkai ka Meghalaya, kaba ïakhun pyrshah ïa katto-katne ki kynhun ba paw jong ka ri ha ka Elite Group-A.
Kum ban kyrtiang dien biang sha kane ka jingïakhun, ka Meghalaya hadien ba ka la shah rem noh ha ka jingïakynting pisa (toss), ka la lah ban kamai 73 ron, kaba jia long ha ka step kaba ka madan ryngkat bad ka suiñ bneng kam ailad ïa ki nongtied jong ka ban lah ban kamai kham bun ïa ki ron.
Haba wan ban bol pat, ki rangïalehkai ka Meghalaya ki la lah ban tehlakam ïa ki nongtied ka J&K tang hapoh ka 200 ron katta 194. Ha ka pali wan tied kaba ar (second innings), ki nongtied ka Meghalaya ki la lah ban kamai haduh 195 ron.
Haba phai sha ki nongkawang bol, u Aaryan Borah ba dei u ‘left arm spinner’ u la lah ban ïoh khur 5 wiket na ka bynta 42 ron, bad na ka liang ki nongtied kum u Arpit Bhatewara u la lah ban kamai 74 ron ha ka pali wan tied kaba ar.
Da kane ka resol, ka kynhun ïalehkai ka jylla kan khreh ban mih pat na la ïing ban hiar sha Vadodara ha kaba kan aireng pyrshah ïa ka Baroda ka ban sdang naduh ka 13 tarik mynta u bnai.
Ban pynkynmaw biang, ka Meghalaya ka la shah ban tied nyngkong hadien ba ka la shah rem ha ka sngi sdang bad ka la shah pynliem noh da 73 ha ki jinglong jingman kiba eh. Nangta ki la khanglad ïa ka J&K ban kamai hapoh 200 – 194 ban long kaba thikna – bad nangta ki la bat bha ban poi sha ka 195 ha ka jingïalehkai kaba ar jong ki.
