Moscow, Naiwieng:
U President ka Russia, u Vladimir Putin, ha ki khyndiat sngi ba la leit, u la ong ba ka Ukraine ka dei ban long pdeng khnang ban plie lad ia ka jingsuk bad ka jingiabeit bad ka Russia ha kane ka sien, khamtam eh u la ong ba ka Ukraine ka dei ban pdiang ia ka rai bad ka mon ki paidbah nongshong shnong ha kito ki bynta khappud ba la ioh kurup da ka Russia ha ki bnai bad snem ba la leit.
Namar u la ong ba lada ka Ukraine ruh kam ailad sa ha kane ka sien ban poi sha ka lad jingiasuk, kam don jingkyrmen shuh ban dang poi sha ka jing-iabeit bad ban wanrah ia ka jingiasuk ha kane ka thma hapdeng ka Russia bad ka Ukraine.
Namar kata, u la ong ba ka Ukraine ka don jingkyrmen skhem kumba ka tip ba ka NATO hapoh ka jing-ialam jong ka US ha kawei ka sngi kan sa pdiang ia ka Ukraine kum ka dkhot jong ka. Dei na kane ka daw ba ka Ukraine kam treh ban pynjem wat la ka sngewthuh ba kam lah ban ialeh pyrshah bad ka Russia.
Ha kawei ka liang u la ong ba lada ka Ukraine kam long pdeng bad ka shaniah ne kohnguh ia kiwei pat ki bor nabar, kan long tang ka tiar ka ban shah pyndonkam bakla ha kiwei pat ki bor.
Namar la ong ba ka Russia ka la ioh synshar ia kumba san bynta ia ka Ukraine ha kine 2 snem shiteng jong ka jingleit hiar thma jongka sha Ukraine. U Putin ha ka 14 tarik u Jylliew jong une snem ruh u la kren shaphang ki mat ba ka Russia ka kwah ban pynurlong lada ka Ukraine ka kwah shisha ia ka jingiasuk lane ka jingsangeh thma.
Hynrei la ong ba ka Ukraine ka la kyntait ia kitei ki jingtyrwa jong u President ka Russia namar ka la ong ba ka Russia ka thmu ban ioh ia ka jingjop da kaba leh ha katei ka rukom bad kumta ruh ka Ukraine ka la pan jingïarap na ki ri ka thaiñ West ba kin ai jingkyrshan ia ka hapdeng ka jingiakhun pyrshah jong ka ia ka Russia.
