Kyiv, Naiwieng:
Katkum ki khubor, la ong ba ka Russia bad ka Ukraine ki la ia ther bom markylliang da kaba phah leit tur ia ki drone jong ki na Russia sha Ukraine bad na ka Ukraine sha Russia. Halor kane, na ka liang u President u ban sa long jong ka US- u Donald Trump u la hap ban phone da lade sha u President ka Russia- u Vladimir Putin ban kyntu ba um dei ban leit hiar thma ne pynheh biang ia ka thma sha Ukraine bad ba ki dei ban ialeh ban wad lad ban pynjai-jai noh ia ka jingiakynad nangne sha khmat.
Namar la ong ba ka jingjop jong u Trump ha kane ka sien, ka long ka jingkyrmen ia ka Ukraine bad Russia bad kin lah ban wanrah noh ia ka jingiasuk bad ban pynkut noh ia ka jingiakynad hapdeng jong ki kumba u Trump hi da lade u la kular naduh ki por ba u dang sdang ban ialap paidbah na ka bynta ka ilekshon President ha US.
U Trump ha kine ki bnai ba la leit, katba u dang pynkhreh ia ka ilekshon President, u la kular ruh ba u lah ban pynkut ia ka thma jong ka Russia bad Ukraine tang hapoh shi sngi lada u la ioh ban long u President jong ka US bad un kren tang shisien kren phone sha u President ka Russia- u Putin ban phah pynkut noh ia ka jingleit hiar thma sha Ukraine.
La ong ba ha ka Sngi U Blei, u Trump u la phone hi da lade sha u President ka Russia ban maham ia ka Russia ba kam dei shuh ban dang leit hiar thma ne leit thombor sha Ukraine lada kwah ia ka shongsuk- shongsaiñ bad ka jingiatrei-lang ha ki por ki ban wan.
