Havana, Naiwieng:
Katkum ki khubor, la ong ba ka ri dew lynnong Cuba ha ka Sngi U Blei, ka la sakhi ia 2 tylli ki jumai kiba khlaiñ bor tang hapoh 1 kynta.
Ka US Geological Survey ka la buh jingkheiñ ia utei u jumai uba khynñiuh ha ka sien ba ar bad la ong ba u dei uba la khlaiñ bor bha uba la kot sha 6.8 Magnitude.
Une jumai u la khynñiuh haduh 14.6 Miles ka jingjylliew shapoh khyndew, kumba 25 Mile na ka duriaw Bartolome Caso, sha ka phang Shathie jong ka Granma. La ong ba utei u jumai ba ar u la wan biang tang hapoh kumba 1 kynta jong utei ba nyngkong uba la don ia ka jingkhlaiñ kaba 5.9 Magnitude.
Ki bor pynïaid ka Cuba ki la pyntip ba kim shym la ioh jingtip eiei ban don kiba shah ktah ne kino- kino ki jingjia kiba sngewsih na ka jing-khynñiuh jong utei u jumai ha katei ka Sngi U Blei.
Haba iadei bad kane, la ong ba ha u Kyllalyngkot jong u snem 2020, u jumai uba khlaiñ haduh 7.7 Magnitude u la pynkhynñiuh ia ki bynta jong ka duriaw Carib-bean Sea bad utei u jumai u la pynkhynñiuh ruh ia katto-katne ki bynta jong ka ri Cuba.
