Beirut, Naiwieng:
Ki bor pyniaid ka Lebanon ha ka Sngi Balang ki la pyntip ba ka jingleit ther bom jong ka Israel, ka la shim ia ka jingim jong 33 ngut ki ‘riew paidbah ha kylleng jong katei ka ri. Napdeng kitei kiba khlad, ki dei kito kiba la shu poi phet sakma kylleng kylleng bad ki la ngat ha kitei ki bom ba la ther da ka Israel ha ka Sngi Ba-ar.
Wat la katta, na ka liang jong ka Israel, ka la pyntip ba katei ka jingleit thombor jong ka sha Lebanon ka long beit thik tang ha kito ki jaka ba don ki ktem jong ki lehnoh Hezbollah hynrei ki bor pynïaid ka Lebanon ki iathuh ba don pat na kitei ki jaka ba ka Israel ka leit thombor, ki dei kiba ym shym don ktem lehnoh eiei hynrei kiba shong tang ki riew paidbah.
Ka tnat ka koit ka khiah jong ka Lebanon ka la pyntip ba ka jingther bom jong ka Israel sha ka shnong Chouf, kaba don sha ka phang South jong ka nongbah Beirut, ka la shim ia kumba 15 ngut ki mynsiem briew ha katei ka sngi.
Kane ka jingleit ther bom jong ka Israel sha Lebanon, ka long ruh hadien ba ka United States ka la dep maham ia ka Israel ba ka dei ban pyn duna noh ia ka jingleit tur sha Lebanon namar ka long ka jingma kaba khraw ia ka Middle East.
