Shillong, Naiwieng 13
Ki nongpynïaid jong ka Nongthymmai Slub & Cultural Club ha ka jingïalang ba kyrpang kaba la long ha ka 11 tarik mynta u bnai, ki la ïakren sani bha ha kaba iadei bad ka mat kaba la mih ha ki lad pathai khubor jong ka jylla ha ka 4 tarik u Nailur 2024 ha kaba “9 ngut ki nongïalehkai ba mynta & barim jong ka Nongthymmai, Nangkiew Irat ki la shah khang ha Mizoram halor ka jingshah kynnoh don kti ban pynbeit lypa ïa ki jingïalehkai.
Katei ka klob lyngba ka kyrwoh ba la pyllait da u President, Bah B. Khyriem bad u General Secretary, Bah J.C Cajee, la ong ba na ka liang ki nongpynïaid ki kwah ban pynpaw ba ki ‘rangïalehkai kiba la paw kyrteng ha ka kyrwoh ba la pyllait da ka Mizoram Football Association ki dei ki ‘rangïalehkai kiba la dep pynrung kyrteng bad ka klob ha ka aïom ba la dep jong ka Shillong Premiere League bad mynta kim don shuh bad kane ka klob.
“Ki bor pynïaid ngim don jingtip shuh ïa ka jaka sah jong ki namar ngi la dep ban pyllait noh ha kaba sdang jong une u snem. Kum ki nongpynïaid klob ngi kwah ban wanrah ïa ka jingkhuid ha ka rukom ïalehkai bad ngi khmih lynti ba ki nongïalehkai jong ngi kiba mynta kin pyni ïa ka mynsiem ïakhun kumba ngi angnud,” la bynrap ka kyrwoh
