Washington, Naiwieng:
U President ban sa long jong ka United States, u Donald Trump ha ka Sngi Ba-ar u la thung ia u Lat ka Arkansas- u Mike Huckabee kum u nong-rah ktien bathymmai jong ka US sha Israel, ha kaba la khmih lynti ruh ba une u nong-ialam u long ka jingkyrmen na ka bynta ka jingpyniasuk hapdeng ka Israel bad ki Hamas ha ki sngi ban wan.
Namar la ong ba utei u nongialam u long u nongkyrshan ba radbah jong ka Israel hapdeng ka jingiaid lynti jong u ha ka kam saiñ pyrthei baroh shi katta bad u long ruh u nongiada ia kito ki jaka ba sah ki phetwir Jiw ha ki bynta jong ka West Bank.
Kumta la ong ba ka jingpynbna jong u Trump halor ka jingthung thymmai ia utei u nongialam, ka la wanrah jingiaroh na ki heh nongialam ka Israel kiba ju sngewjan bha ia utei u nongialam hynrei la ong ba dei tang ki nong Palestine kiba lah ban ym sngewtynnad ia utei u nongialam namar ki daw jingiakynad ba la mih ha ki snem ba la leit.
U Trump ha katei ka sngi u la ong ba une u nongialam ba thymmai u ieid ia ka jaitbynriew Israel bad ki briew ka Israel ruh ki ieid bad sngew jan bha ia u. Namarkata, la ngeit skhem ba ka jingbuh ia u kum u nongialam bad u nong-rah ktien ka US sha Israel ha kane ka sien, kan iarap ban wanrah noh ia ka shongsuk- shongsaiñ ha Israel bad ha kito ki ri kiba iakynad bad ka Israel ha kane ka por.
U Huckabee u la don 69 snem ka rta bad une u nongialam, u la pyrshah jur ia ka jingleit pynshit jong u Biden ia ka Israel ban kput ia ki lehnoh Hamas naduh ba sdang ka thma bad kumjuh ruh pat ia ka jingkwah jong u Biden ban pyniasuk bad pynkut noh ia ka thma ha kane ka por.
