Shillong, Naiwieng 14
Ka jingshah kyndang jong ki ïing ki sem, ka jingshah tuh jong ar shaka ne ki kali, ka dang ïai bteng na kawei ka sngi sha kawei pat. Dang ha kine ki sngi kiba la leit ruh ka la don biang ka jingshah kyndang jong ki ïing ha ki runar bad ïoh ruh ban khung ka pisa da ki phew hajar.
Katkum ka khubor kaba la ïoh lum na ki pulit la ong ba ka Kong Lilina Marbañiang ka la ujor sha ki pulit ba ha ka 10 tarik mynta u bnai hapdeng ka por 2.30 mynsngi haduh 6.30 janmiet, ki runar bym lah ban ithuh ki la ïoh ban prong tuh ïa ka ïing jong ka, kaba don ha Hopkinson Road, Laitumkhrah, Shillong bad ban tuh ïa u kynjri ksiar uba shongdor kumba T.70,000/-.
Ha kawei pat ka khubor na ki pulit la ong ba ha ka 12 tarik mynta u bnai ha ka por kumba 6.50 janmiet, uwei u samla uba la tip kyrteng kum u Lumlang Kurbah (18 snem) u la shah kem ha ki paidbah, katba u dang thmu ban tuh ha Smit, East Khasi Hills bad kham hadien la aiti noh sha ki pulit.
Kumjuh, na ka liang jong ka Kong Sweety Merry Lawrynniang ka la ujor sha ki pulit ba ha ka 10 tarik mynta u bnai ha ka por kumba 8.15 mynmiet, ki runar bym lah ban ithuh ki la prong tuh ïa ka ïing jong ka, kaba don ha Lumsohkhlur ha Eastern West Khasi Hills bad ban tuh ïa ki pisa kaba long T.45,000/-.
Shuh shuh ka khubor na ki pulit ka la ïathuh ba u Manoj Kumar Prasad na Ladrymbai ha East Jaiñtia Hills u la ai ka jingujor ba ha ka 10 tarik mynta u bnai, ha ka por kumba 9 baje mynstep, ki runar bym lah ban ithuh, ki la ïoh ban prong tuh ïa ka kudam jong u, bad ban tuh ïa ki marbam-mardih kiba shongdor haduh kumba T.6.61 lak.
Ha kawei pat ka khubor, u Wankitboklang Khongsngi uba na ka shnong Lawsohtun Block-I, Shillong u la ujor sha ki pulit ba ha ka 11 tarik mynta u bnai, ki runar bym lah ban ithuh ki la tuh ïa ka ar-shaka ka jong u, kaba don ïa u registration number ML05-AB-8896 na ka dong kaba u sah.
