Chennai, Nailur:
Da kaba don katto katne ki jaka ha ki thaiñ Shathie bad ki distrik ba shaphang Sepngi kiba lah ban shah ktah ha ka jingtwa khyndew, ka sorkar ka la bthah ïa ki heh jong ka distrik ban pynjur ïa ka jingpeitngor bad jingpynkhreh, khamtam ha ki jaka kiba pyni ïa ki dak jong ka jingkhih ka khyndew.
Ha ka jingïalang bishar bniah bad ki 10 ngut ki nonglum khajna ha ka sngi Ba-ar, u Myntri Rangbah ka jylla u C Joseph Vijay u la ong ïa ki heh sorkar ba kin ithuh bad buddien beit ïa ki jaka kiba lah ban shah ktah bad ban leh mardor ïa ki dak jingmaham ban ïada na kano kano ka jingduh ïa ki jingim bad jingjulor ki ïing ki sem, ki jingtei bording bad ki surok ha ka por ba jur slap.
Ki kam ban ïada na ka jingtwa khyndew bad ban pynbeit ïa ki lum ha ki jaka ba la ithuh ruh dei ban pynsted, kynthup ïa ki kam ban thep khyndew kum kiba la leh ha Kodaikanal.
Ka jingpynbna ba thikna ka la kdew ïa ki jingtip ba la rim bha naduh u snem 1973, ha kaba la ïoh jingtip ba 490 tylli ki jingtwa khyndew ha The Nilgiris distrik, 257 tylli ha Dindigul distrik, 238 tylli ha Coimbatore distrik bad 91 tylli ha Theni distrik. Shuh shuh, katkum ka jingpeit bniah ïa ka jingma, la ithuh ïa 79 tylli ki jaka kiba don jingma ha ka distrik Nilgiris bad 24 tylli ha ka distrik Dindigul.
U Vijay u la ban jur ruh ïa ka jingdonkam ban buddien bha ïa ki surok bah bad ki jingpynïasoh ïa ki kali sha ki jaka lum, ha kaba ka jingtwa khyndew ka lah ban pynthut ïa ka jingpynïasoh.
Ki mashin, ki briew bad kiwei kiwei ki tiar ki dei ban buh lypa khnang ban pynkhuid kloi ïa ka khyndew, ki maw bad ki sboh lada jia ba ka jingtwa khyndew.
U Myntri Rangbah u la bthah ruh ba dei ban pynlong ïa ki Mock Drill bad ki prokram pynsngewthuh paidbah hapdeng ki nongshong shnong ha kum kine ki jaka ba don jingma shwa ban sdang ka slap, katba dei ban pynthikna ruh ïa ka jingpynkynriah ïa ki da kaba suk ha ka por bad ka jaka ba donkam.
Ha ki distrik ba shaphang Shathie, ïa ki jingthmu pyntreikam ban buh ïa ki nala, jingkieng, ki rudwah bad ki nur pynïaid um slap, yn sa jurip bniah bad yn sa khmih bniah ha kaba ïadei bad ki jingwanrah ïa ki jingpyntreikam ban pyndep hashwa ka jingwan biang jong ka Lyiur.
U Vijay u la bthah ruh ïa ki heh sorkar ba kin pynjur ïa ki lad jingïada na ka jingpang dengue.
Ha kane ka jingïalang la ïadon lang ki nonglum khajna kiba na Coimbatore, Theni, Dindigul, Erode, Karur, Madurai, Nilgiris, Sivagangai, Tenkasi bad Virudhunagar, ha ryngkat u Chief Secretary u M Sai Kumar bad ki heh sorkar.
