Bengaluru, Nailur:
Ka tnad pla tyngka ka la ai jingmut ïa ka sorkar jylla ban pynlut da ka jingstad ha ka jingshai jong ka jingduna pisa bad ka sorkar ka pynlut ïa ka jinglah ban shim ram jong ka.
Haba ïadei bad ka jingai jingmut jong ka tnad pla tyngka halor ka jinglong jingman jong ka pla tyngka jong ka jylla, u Myntri Rangbah ka jylla u DK Shivakumar ha ka sngi Ba-ar u la ong ba la ai da kaba buh ha ka jingmut ïa ki jingmyntoi jong ka sorkar.
“Kum u Myntri ka tnat Pla Tyngka, nga tip kino ki skhim ban pynsangeh bad kino ban pynrung. Ki dor ki la kiew sha bneng katba ka jingïoh jong ki briew ka la hiar stet; dei na kata ka daw ba ngi la pyntreikam ïa ki san tylli ki jingkular. Ngi kyrshan ïa ka jingim jong ki nongrep bad ki paidbah,” ong u Shivakumar.
Ha ka jingthoh jong ka sha ka ophis jong u Myntri Rangbah, ka tnad ka la ong, “Kan long ka jingkhmih bniah ban long kiba shisha ha kaba ïadei bad ka jingai pisa kaba don bad ban ym pyndap shuh ïa ka jingkiew palat jong ka jinglut jingsep kaba dang sah jong ki kam.”
U Myntri Rangbah u la ong ba ka sorkar pdeng ka dei ban pyllait noh ïa ki Grant kiba dei ban ïoh ha ka jylla. “Ka sorkar pdeng ka dei ban pyllait noh ïa ka pisa kaba la dep pynbna T.5,300 klur na ka bynta ka Upper Bhadra Project”, la ong u Shivakumar.
Ha kajuh ka por, u Nongïalam ka Liang Pyrshah ha ka Ïingdorbar R Ashoka u la kynthoh pyrshah ïa ka sorkar Congress halor ka jingpeit bniah jong ka tnad pla tyngka.
U Ashoka u la kynnoh ba la kylli ïa ka sorkar jylla ba ïa ki projek kiba heh khlem ka jingmang pisa ym lah ban shim lymda la pynïaid ïa ki lad jingïarap. U la kynnoh ba ka jylla ka la “duhnong”, da kaba kdew ba ka tnad pla tyngka ka la maham ban shim ïa ki skhim kiba shongdor T.1,000 klur ki bym shym la pynbiang ha ka mang tyngka 2026-27.
“Ka Karnataka ka la dep pyndonkam lut ïa ka jinglah ban shim ram ban pyndap ïa ki jingdonkam jong ka. Ha kiwei pat ki kyntien, kam lah ban shim ram shuh bad yn ym ai jingbit. Halor ki skhim ba la pynbna ha ka mang tyngka 2026-27, kam don jaka ban shim ram shuh shuh ban bei tyngka ïa kum kine ki projek kiba heh,” ong u Ashoka.
U la ong ba ka jylla ka ïakynduh ïa ka “jingkyrduh pisa” wat haba ki nongrep ki mad jingeh namar ka jingkyrduh pisa jong ka mariang.”Ngam pat ju ïohi ïa ka tnad pla tyngka ban leh kum kane”, u la ong.
U Ashoka u la kynnoh ruh ba ka sorkar kan dang ïai bteng ban pynkylla ïa ka pisa ba la thmu na ka bynta ki Scheduled Caste bad Scheduled Tribe hapoh ka prokram SCSP bad TSP.
U la kynnoh ba ki bill kiba dang sahteng ha ki tnad bapher bapher ki la palat ïa ka 2 lak klur tyngka bad u la ong ba ki kompeni kit mar, ki kompeni ai um bad ki kompeni pynmih bor ding ki ïakynduh ïa ka jingeh kaba jur ha ka liang ka pisa tyngka.
U la kdew ruh ïa ka jingkynnoh ba ka don ka jingpyrshah halor ka jingai jingïarap bording, da kaba ong ba u Myntri ka tnat bording u K J George u la pynpaw ba ym don ki jingïarap ba dang sahteng, katba ka tnad pla tyngka ka la pyni ba ïa ki jingïarap hap ban pyllait sha ka tnad bording.
