Bhubaneswar, Nailur:
Ka BJD ha ka sngi Balang ka la dawa ban iehnoh kam ïa u Myntri Rangbah ka jylla u Mohan Charan Majhi uba bat ïa ka tnad Home portfolio, ha kaba ïadei bad ka jingkynnoh ba la pyndik ïa ki saw ngut ki riewngeit hajan ka temple Kapilash ha Dhenkanal dang shen.
Haba kren ha ka jingïalang bad ki lad pathai khubor, ka President ka Biju Mahila Janata Dal, ka Snehangini Chhuria, ka la dawa na u Myntri Rangbah ka jylla, ba u dei ban shim ïa ka jingkitkhlieh kaba don akor halor katei ka kam bad ban ai ïa ka jingiehnohkam jong u.
“Naduh ba ka sorkar BJP ka la wan ha ka bor ha Odisha, ki jingjia jong ki kam runar pyrshah ïa ki kynthei ki la nang kiew bha. Ki jaka jngohkai pyrthei ki la kylla long ki bym shngain. Kane ka dei ka kam kaba pynjah burom ïa ka jylla”, ka la ong.
U nongïalam ka BJD u la kynnoh shuh shuh ba watla ka la wanrah ïa ka jingshah lehbeiñ bad jingshah pynrem ha ka ri bad ka pyrthei, hynrei ka sorkar kam shym la shim ïa ki lad ki lynti kiba biang ban pynbeit. “Hadien ka Gopalpur, ki mukotduma jong ki kam runar pyrshah ïa ki kynthei ki la paw pyrthei naduh Bali Harachandi, Dhauli, Rayagada bad mynta ka Kapilash”, ka la ong.
Ka MLA ka Manorama Mohanty ka la dawa ba ka sorkar ka dei ban leit namar ba ka la pheil ban ai jingïada ïa ki kynthei.
Ka Chairman barim jong ka State Women’s Commission ka Minati Behera ka la ong ba katkum ka kaiphod jong ka NCRB, ka Odisha ka don ha ka kyrdan ba nyngkong ha ki kam runar pyrshah ïa ki kynthei.
