Srinagar, Nailur:
Ka sorkar Jammu & Kashmir ka la mynjur ïa ka skhim ha kaba ki longïing kiba hap hapoh ka Antyodaya Anna Yojana (AAY) kin ïoh 6 tylli ki cylinder LPG khlem jingsiew man la u snem.
U Myntri ka tnat Food, Civil Supplies and Consumer Affairs u Satish Sharma, u la pynbna ïa katei ka rai ha ka ïingdorbar thawaiñ ka jylla ha ka sngi Palei, kaba la pynmih ïa ka jingkhihwin kaba mardor na ka liang pyrshah.
Ki dkhot ka BJP ki la pynmih ïa ki jingpyrta “Jhooti Sarkaar” bad “Yeh dhokha hai”, da kaba kynnoh ba ka sorkar ka la pynsniew ïa ka jingkular jong ka ha ka elekshon kaba mynshwa ban ai tyndong LPG khlem jingsiew.
U nongïalam ka Liang Pyrshah u Sunil Sharma u la kynnoh ba ka liang synshar ka la kular ban ai 12 tylli ki cylinder LPG khlem jingsiew sha man la ka longïing ha ka por ïalap elekshon, hynrei mynta ka la buh pud ïa ka jingmyntoi haduh 6 tylli bad tang ïa ki longïing AAY.
“Ar snem mynshwa, phi la pynbna ban ai 12 tylli ki cylinder khlem jingsiew na ka bynta kawei ka longïing, mynta ka sngi u Myntri u ong ba 6 tylli yn ai tang sha ka AAY, kane ka dei ka jingleh rkhie beiñ, phi la shah pynpaw pyrthei”, la ong u Sharma.
U Sunil Sharma u la kynnoh shuh shuh ba ka jingbuh kyndon ïa ka skhim tang 6 tylli ki cylinder wat ia ki longïing kiba duk tam ka long kum ka jingshet kylla ïa ki paidbah. U la buh jingkylli ruh ïa ka sorkar halor kiwei pat ki jingkular jong ka ha ka por thep vote, kynthup ïa ka shi lak tylli ki kam bad 200 unit ka bording khlem jingsiew.
Ka jingkylla ka la wanrah ïa ka jingpyrshah kaba jur na baroh ar tylli ki tnad pla tyngka bad na ka liang pyrshah. U Lamphang u Abdul Rahim Rather u la wan tuklar bad pyrshang ban pynbeit biang katba ka jingpyrta ka dang bteng katto katne por.
