Bhopal, Naiwieng:
Shi sngi hadien ba la ïoh jingtip ba ki nongthep vote ki la poi palat 77% ha ka jingthep vote jong ka ilekshon shiteng samoi ha Vijaypur konstitwensi jong ka thaiñ Gwalior-Chambal jong ka Madhya Pradesh, ka seng ka liang pyrshah (Congress) ka la dawa ban thep vote biang ha ki 37 tylli jaka thep vote jong kane ka konstitwensi.
“Ka jingshah leh donbor kaba khlem pat ju jia khamtam ha ki shnong jong ki riewlum, ki rit paid bad ki nongthep vote ba la buh por kaba la sdang shwa ka jingthep vote ka la bteng hadien ka jingthep vote ruh,” ong u President ka Congress ha ka jylla u Jitu Patwari uba la kynnoh halor kane ha ka Sngi Palei.
U la ong ba ki ïing jong ki kynhun jait bynriew Jatav ki la shah thang da ka ding bad ka durmot jong u Dr BR Ambedkar ka la shah pynjulor ha kawei ka shnong ha ki briew jong ka BJP, tang kumba katto katne kynta hadien ka jingthep vote.
U la ong ruh ba uwei u ophisar jong ka Sector u la shah thombor hakhmat ki pulit ha ka por thep vote, kaba kren shai shaphang kumno ki briew jong ka BJP ki la leh ïa ka jingsynshar donbor ban khanglad ïa ki riewlum, ki rit paid bad ki nongthep vote SC ban ïashim bynta ha ka jingthep vote kum ka hok jong ki ha ka sngi Balang.
“Shwa ka ilekshon, ngi la dawa ban khang ïa u pud u sam jong ka MP-Rajasthan ban khanglad ïa ka jingwan rung jong ki ‘riew sniew na ka jylla ba marjan, hynrei ki bor pynïaid ilekshon kim shym la leh ei ei bad ka jingmih ka long ba ki riew sniew na Rajasthan kiba trei na ka bynta ka seng kaba bat ïa ka jingsynshar ki la pyntieng bad la thombor ïa ki nongthep vote riewlum ha ki shnong bapher bapher ban khanglad ïa ki ban thep vote pyrshah ïa ka BJP,” ong u Patwari.
U Patwari u la ong ba la aiti ïa ka thup jong ki 37 tylli ki jaka thep vote ha kaba ka jingthep vote ka la shah pynthut ha ka jingshah thombor, ka jingbat ïa ki jaka thep vote da kaba leh thok ïa ki vote.
“Ngi la dawa na ka Election Commission of India (ECI) ban thep vote biang ha kine ki 37 tylli ki jaka thep vote. Ngi la ngeit skhem ban jop ha ka jingthep vote ha Vijaypur da palat 50,000 vote, hynrei wat hapdeng ka jingleh donbor bad ki kam bym hok ha ka jingthep vote, ngi la thikna ban jop ïa ka ilekshon shiteng samoi da ki vote kiba palat 25,000. Hynrei ka BJP kaba bat ïa ka jingsynshar, ka la kyntait ïa kane ka jingkynnoh jong u President ka seng Congress ha ka jylla.”
U Myntri Sorkar jong ka jylla, u Prahlad Singh Patel, u la ong ha Delhi, “Ym lah ban mutdur balei ka seng kaba bat ïa ka jingsynshar kaba sngewskhem ban jop ïa ka ilekshon kan pyndonkam da ki kam thombor bad ki kam bym hok. Namar ba ka Congress ka tip ba ka la rem ha baroh ar ki ilekshon shiteng samoi ha Vijaypur bad Budhni, ka pynmih ïa ki jingkynnoh lamler ban pynsniew dur bad pynthoh bria ïa ka seng kaba bat ïa ka jingsynshar.”
“Ha ki hynriew tylli ki samoi treikam u kyrtong jong ngi ha Vijaypur konstitwensi u Ramniwas Rawat u la long u MLA ka Congress na kajuh ka konstitwensi, da kaba kynnoh ba u kyrtong ka BJP u la pyndonkam da ki kam thombor bad ki kam bym hok, hato ka Congress ka kwah ban ong ba u la jop ha ki hynriew tylli ki ilekshon kum u kyrtong jona ka seng Congress ha kum kane ka rukom,” u la bynrap.
Katba u heh pulit jong ka Sheopur district (Ka Vijaypur ka dei ka bynta jong ka Sheopur district) u Virendra Jain, u la ong ba hadien katto katne kynta ba la wai ka jingthep vote ha ka sngi Balang, la ïoh jingtip ba don katto katne ki jingkulmar hapdeng ki ar tylli ki kynhun kiba ïaleh pyrshah ha ka shnong Gohta.
“Ki kynhun jong ngi ki la leit mareh sha katei ka shnong hynrei ki la lap ba ki khubor ba la thang ïa ki ïing jong kawei ka jaitbynriew, ki long kiba bakla. Tang ka bynta kaba heh jong ka Bajra ba la buh kynton la thang ha ka shnong. Ha ka step jong ka sngi Palei, ki kynhun jong ngi ki la mareh biang sha katei kajuh ka shnong halor ka jingujor jong u Chowkidar shnong halor ka jingpynjot ïa ki bynta jong u durmot jong u Dr BR Ambedkar, ha kaba la shem ba ka long kaba shisha. La i kumba don ki katto katne ki riew pyrshah ïa ka imlang -sahlang kiba la leh ïa kane ka kam ban pynthut ïa ka jingsuk ha shnong. La dep ban buh jingujor pyrshah ïa ki briew ki bym shym la ithuh kiba donkti ha ka kam thombor khnang ban lah ban ithuh bad ka jingtohkit halor ka jingjia ka dang ïaid shakhmat,” ong u Jain ha ki nongthoh khubor.
Kaba kongsan ka long ba palat 76% ka jingthep vote la ïohi ha ki jingthep vote ha Budhni bad Vijaypur ha ka sngi Balang ha MP.
Ha Vijaypur, u MLA barim ka Congress uba la long MLA la hynriew sien bad u Myntri ba dei peit ïa ki khlaw ki btap ha ka sorkar BJP jong ka jylla, u Ramniwas Rawat, u dei u kyrtong jong ka seng kaba bat ïa ka jingsynshar pyrshah ïa u nongïalam riewlum ka Congress, u Mukesh Malhotra, uba dei u nongïalam barim ka BJP.
