Shillong, Naiwieng 15
Ka jinglehniam Ïewduh ïa kaba la ju pynlong shisien shisnem da ka Raid Mylliem kaba hap hapoh ka Hima Mylliem ha ka 15 tarik u Naiwieng 2024 ka la pynlong ïa ka lehniam-lehrukom kum shibynta ban bha ka kamai-kajih jong ki khun-ki hajar jong ka Hima baroh kawei da kaba pomblang ha ryngkat ka kñia-ka khriam.
Ïa kane ka lehniam Ïewduh la pynlong ha Ïewduh ha ka jaka lehniam kaba la ju pynlong manla u snem.
Kane ka jinglehniam ka dei jong ki 5 Kur bad ki 11 kur. Ïa kane ka jinglehniam la pynlong ha ka jaka lehniam ba kyntang kaba don ha Ïewduh bad ha basa tympew ha kaba ïa kane ka jinglehniam Ïewduh la khlieh da u Myntri Sohtun, u Myntri Nongkhlaw, u Myntri Kharkongor, u Myntri Kurkalang bad Myntri Synteng-Nongdhar.
Ha kane ka sngi la wan ruh ban sakhi da ki Myntri jong ka Hima Mylliem, ki ophisar ka KHADC, ki khun-ki hajar ka Raid, ki paidbah nongshong ïew ha Ïewduh nalor kiwei-kiwei. Ha kane ka lehniam kaba ar bynta, la don shwa ka duwai-ka phirat bad kaba bud pat sa ka ot syiar, pomblang bad ruh ïa u sniang ïa kaba la leh ha basa die tympew.
