Shillong, Naitung 26
Ka O.M Roy Memorial HSS, Little Star HSS bad ka North Liberty HSS ki la long ki lahduh ha ka State Level Inter School Subroto Mukherjee Football Cup 2026, hadien ba la khur ïa ki nam jop ha ka sngi Saitjaiñ.
Kine ki kynhun kin mihkhmat ïa ka Jylla sha ka International Subroto Mukherjee Football Cup 2026 ka ban long shen ha ka nongbah Delhi bad ha Bengaluru.
Haba phai sha ka jingïakhun final jong ka Under-17 Boys kaba la long ha SSA Stadium Polo, ka O.M Roy na East Khasi Hills ka la pynliem noh ïa ka Wapung HSS na East Jaiñtia Hills da 3-0 kol bad u Deiwamut Syiem u la thep ar kol.
Kane ka jingïakhun ka la long kaba noh shilliang namar ka OM Roy ka la ïoh bun tylli ki kabu ksiar. Kane ka kynhun ka la ïoh ban pynkhih jar nyngkong eh lyngba u Deiwamut ha ka minit kaba 21 na ka bynta ban tam shi kol ha ka kylla step.
Hadien katto katne por ba la bteng ïa ka kylla miet, katei ka kynhun kaba na Mawlai Kyntonmassar ka la thep biang ïa ka kol kaba ar lyngba u Chesterfield Umsong (43′). U Deiwamut u la pynbud biang ïa ka kol kaba ar jong u ha ka minit kaba 69. Haduh kaba kut ka Wapung kam shym la lah ban pynphai bad ka la mad ïa ka jingshah rem.
Ha ka jingïakhun final jong ka Under-15 Boys, ka North Liberty na West Jaiñtia Hills ka la pynliem noh ïa ka Umpohliew Jingtip HSS na East Khasi Hills da 2-1 kol.
Kane ka nam jop ka la wan urlong lyngba ki ar kol ba la thep da u KyrshanlangChyrmang ha ka minit kaba 19 bad kawei pat la thep da u Malcolm Nongbsap (20′), hynrei u Meshanskhem Kharbudon (43′) u la lah ban pynphai kylla shi kol na ka bynta ka Umpohliew Jingtip hashwa ba kan mad ïa ka jingshah rem.
Haba phai sha ka kyrdan ïalehkai Under-17 Girls, ka Little Star na Eastern West Khasi Hills ka la pynliem noh ïa North Liberty lyngba ka tie-breaker da 4-1 kol hadien ba kine ki kynhun kim shym la lah ban thep kol haduh kaba kut ka jingïalehkai.
Ïa ka nam Best Goalkeeper la ïoh da u Fairland Nengnong na ka Umpohliew Jingtip (U-15 Boys), ka Joplin Thongni na ka Little (U-17 Girls) bad u Redimingson Phawa na ka Wapung HSS (U-17 Boys). Katba ka nam Player of the Tournament ka leit sha u Inibait Lamare na ka North Liberty (U-15 Boys), ka Jessica Myrthong na ka Little Star (U-17 Girls) bad u Ebenezer Sun na ka O.M. Roy Memorial (U-17 Boys).
Ïa ki khusnam sha kine ki kynhun la sam da u President ka Meghalaya Football Association u Bah Hamletson Dohling ha ryngkat u Vice President MFA Bah Cliff Nongrum, ki ophisar ka tnat ïalehkai bad kiwei kiwei.
