Shillong, Naiwieng 15
Ha ka jingim briew ngi ju mlien bha ban ud ban nam wat la don tang khyndiat i jingwit-jingthut. Hynrei lada phai pat sha kito ki briew kiba kham kyrpang kiba don jingduna ha ki dkhot met ki long pynban kiba trei shitom bad minot thop ha kano-kano ka kam ba ki leh bad ki lah ruh ban poi sha ki bynta ba kham shalor jong ka jingim.
Kane ka nuksa ka dei na uwei u heprit, 12 snem, uba kyrteng u Graham Jones Kharnarbi, ba shong ba sah ha Jaïaw Laitdom, Shillong bad u dei u khun ba ar jong i Bah Terence Jones Lyngskor bad i Kong Suzie Kharnarbi.
Une u heprit ym kum kiwei ki para khynnah kiba biang ha ka longrynïeng-manrynïeng hynrei u don ka jingduna dkhot met ha kaba um lah ban ïaid, pynban u la lah pat ban wanrah nam ïa ka ïing ka sem bad ka jylla hi baroh kawei da kaba ïoh khur takma ksiar ha ka jingïakob ïakhun kti jong ka Asian Arm Wrestling Cup 2024 kaba la long ha ka nongbah Mumbai naduh 19 haduh 27 tarik u Risaw. Kane ka dei ka sien ba nyngkong ba une heprit u leit ban ïakhun shabar jong ka ri, katba ha ka jylla u la ju ïashim bynta bunsien ha ki jingïakob bapher-bapher kiba kynthup ïa ka Open Meghalaya Arm Wrestling, Para Arm Wrestling Champion 2024, Shillong Arm Fight All India Champion bad kiwei-kiwei.
Halor kane ka jingjop bakhraw na ka liang u MLA jong ka North Shillong Constituency, Bah Adelbert Nongrum ha ka Sngi Ba-ar jong ka taïew u la leit ban ai khusnam ryngkat ka song pisa T.30,000/- sha une u heprit ha ïingsah jong u. Na ka liang u MLA u la ong ba ym tang ba u heprit u la wanrah nam ïa ka ïing ka sem, ka shnong ka thaw hynrei ïa ka jylla hi baroh kawei bad ha ka jingïakhun thma pyrshah ïa ki kam sniew kiba bun. Nalor nangta, u MLA u la kyntu ïa ki samla ba kin phai khmat sha ka kam ïalehkai Sports khnang ba kin lait na ki jingmlien ba sniew, bad ba u heprit Graham Jones u la long ka nuksa bakhraw na ka bynta baroh ki para heprit bad ki samla kumjuh.
