Bhubaneswar, Naiwieng:
Kum shi bynta ban khanglad ïa ki kam thok ha ka por ba thoh ïa ki eksamin, la rai ban set patok haduh 5 snem namar ba ka Odisha ka wanrah ïa ka aiñ thymmai kaba pyrkhing.
Ïa mynta, kam don kano kano ka kyndon kaba kyrpang ban tap ïa ki kam bym hok ha ka por eksamin, ha kaba ki pulit kham shwa ki ju set patok ïa ki nongleh kam sniew katkum ki kyndon jong ka Indian Penal Code, bad naduh u Naitung, hapoh ka Bharatiya Nyaya Sanhita.
Ka jingpynlong ban wanrah ïa ka jingleh thok ha ki eksamin kum ka kam runar kaba lah ban tip, kaba ym lah ban bah- jamin bad kaba ym lah ban siew, ka jingshah set patok haduh san snem bad ka kuna haduh T.10 lak – kine ki dei napdeng ki kyndon bathymmai kiba pyrkhing bha ha ka aiñ ba pyrshah ïa ki kam thok jong ka sorkar Odisha, kaba wan hapdeng ki jingkynnoh ba don ki jingbym beit ne ïaid ryntih ha ki eksamin bapher bapher ba la dep ban pynlong.
Ïa kane ka aiñ kaba la tip kum ka Odisha Public Examinations (Prevention of Unfair Means) Act, 2024, la khmih lynti ba yn sa mynjur ha ka dorbar jong ka ïingdorbar ha ka jylla ka ban sa wan kaba la buh ban sdang naduh ka 26 tarik u Naiwieng. “Ban khanglad ïa ki rukom leh bapher bapher kiba long da ka jingleh thok. Ka jingleh thok, bad ka jingpynthut ïa ka rukom thoh eksamin, ka jinglait tuh ki jingkylli kiba ïadei bad ka eksamin shwa ka por ba la buh ban thoh eksamin, ka jingrung khlem jingbit sha ki jaka eksamin bad kiwei kiwei bad ban pynneh ïa ka jinglong hok bad khuid jong ki eksamin.”
“Kino kino ki briew kiba pyndonkam da ki lad ki lynti bym hok bad ki kam runar, kin shah pynshitom da kaba set patok kaba lai haduh san snem bad ka kuna haduh shi lak tyngka”, la ong u Ahuja hadien ka jingïalang jong ka kynhun Myntri.
Mynta, ym pat don ka kyndon pynshitom kaba kyrpang ban tap ne buhrieh ïa ki kam bym hok ha ka por ba leh ïa ki eksamin, ha kaba ki pulit mynshwa ki ju pynngat ïa ki nongleh kam sniew katkum ki kyndon jong ka Indian Penal Code, bad, naduh u Naitung, ka Bharatiya Nyaya Sanhita.
Ka jingpynshitom ïa kiba leh thok katkum ka IPC ka long haduh hynriew snem katba kata katkum ka BNS ka long lai snem.
Shisien ba la pass, baroh ki eksamin ba la pynlong da ka Odisha Public Service Commission, ka Odisha Staff Selection Commission, ka Odisha Subordinate Staff Selection Commission bad ka Service Selection Board yn pynbeit katkum ka aiñ. Kan treikam ruh na ka bynta ki jingpynrung kam ba la pynlong da ka Odisha Police Selection Board, State Selection Board ba la thaw hapoh ka Odisha Education (Selection Board na ka bynta ka Jylla) Rules, 1992, kumjuh ruh na ka bynta ki eksamin thung kam na ka bynta ka sorkar jylla bad ki ophis ba hapoh jong ki.
Ka Odisha Joint Entrance Examination, kaba la pynbeit da ka Odisha Professional Educational Institution (Regulation of Admission and Fixation of Fee) Act, 2007, kan hap ruh hapoh kane.
Kaba kongsan ka long ba ki nongpynbit pynbiang kiba don bynta ha ka ban pynlong ïa ki eksamin bapher bapher ruh kin ngat ha ka kuna kaba lah ban kiew haduh ka dor kaba haduh T.1 klur, bad ïa ka jinglut kaba ïadei bad ka eksamin ruh yn ïoh biang na kum kine ki nongpynïaid ïa ka kam.
“Lada ym lah ban siew ïa ka kuna, yn pynngat da ka jingpynshitom kaba nangjur shuh shuh da ka jingshah set patok, katkum ki kyndon jong ka Bharatiya Nyaya Sanhita, 2023,” ong uwei u ophisar ha ki nongtoh khubor.
Ha u bnai ba la dep, ki nongwad kam ha Odisha ki la pynlong ïa ki jingïakhih ban dawa ban pynsangeh noh ïa ki eksamin Online ba la pynlong da ki tnad sorkar jylla bapher bapher na ka bynta ki kam kum ki nongpeit khajna, ki nongpeit ICDS bad ki ophisar jong ka jingkheiñ jingdiah da kaba kdew ïa ki jingïapher kiba khraw ha ka rukom pynlong ïa ki eksamin.
Ki jingbym ïaid beit ha ka Odisha Public Service Commission ruh ki la paw ha u snem ba la dep.
