Jowai, Naiwieng 18
Ka 7 Wasa bad Nangbah Mulang ki la ïoh jingjop ha ka Super Division Football Tournament na ka bynta U Kiang Nangbah Memorial Trophy 2024 ba la pynïaid da ka West Jaiñtia District Sports Association (WJDSA) ha ka Lah Sngi U Blei ha Kiang Nangbah Stadium, Jowai.
Haba phai sha ka miej ïakheiñ poiñ ha ka sien ïakhun kaba mar saw sien, ka Nangbah Mulang ka la wan ha ka kyrdan ba ha khlieh duh da kaba kamai 12 poin bud ka 7 Wasa kaba la ïoh 8 poiñ, ka Ladthadlaboh, Demthring bad Wahïajer ki la ïoh mar 7 poin, ka Mukhla Raij (4 poiñ), katba ka Shangpung Lumiawmushai bad Sailung Ïalong ki dang long ki kynhun kiba dang mad ïa ki jingshah rem.
Haba phai sha ka jingïalehkai, ka 7 Wasa ka la pynliem ïa ka Shangpung Lumiawmu-shai da 6-1. Ïa kine kol la thep da u Samuel Sumer (16), Jeff K Rymbai (71), Niewkor Sana (75), Dawan Malang (82), Embor Lamare (85) bad Syndong Lyng-doh (90), katba ïa ka shi kol jong ka Shangpung Lumiawmushai la thep da u Raplanglangki Shullet (30).
Ha ka jingïalehkai kaba bud, ka Nangbah Mulang ka la pynliem ïa ka Ladthadlaboh da 1-0 kol. Kane ka la wan lyngba u Dashngain Sukhlaiñ uba la ïoh thep kol ha ka minit kaba 81.
Kane ka lympung kan bteng biang ha ka 20 tarik ha kaba ka Mukhla Raij kan ïakhun pyrshah ïa ka Nangbah Mulang ha ka por 1 baje mynsngi, katba ka Sailung Ïalong ïa ka Shangpung Lumiawmushai ha ka por 2 baje nohphai sngi.
