Shillong, Naiwieng 20
U Myntri ka tnat ïalehkai jong ka Kerala, u V. Abdurahiman, ha ka sngi Balang u la pynpaw ba ka kynhun ïalehkai phutbol jong ka Argentina, kaba kynthup ïa u rangïalehkai ba pawnam u Lionel Messi, kan sa leit sha Kerala ha u snem ban wan na ka bynta ka jingïalehkai bar ri.
Haba kren ha ka jingïalang bad ki nongthoh khubor, utei u Myntri u la pynpaw ba ïa kane ka jingïalehkai yn pynlong hapoh ka jingpeit ba pura jong ka Sorkar Kerala.
“Baroh ki jingïarap pisa na ka bynta ban pynlong ïa kane ka jingïalehkai phutbol kaba pawnam yn pynbiang da ki nongkhaii katei ka Jylla,” la ong u Myntri, da kaba pynpaw ïa ka jingshaniah ha ka jinglah jong ka Kerala ban pynlong ïa kane ka jingialehkai kaba pawnam.
“Ka kynhun ïalehkai phutbol ba nyngkong ha ka pyrthei, ka Argentina, kaba kynthup ïa u Lionel Messi, kan wan sha Kerala,” u la bynrap.
Ki nongpynïaid jong ka kynhun ïalehkai jong ka Argentina kin sa pynbna paidbah ha kaba ïadei bad kane ka bynta.
“Ki briew kiba sngewkhia ïa ka kynhun ïalehkai phutbol kin wan sha Kerala hapoh shibnai shiteng”, la ong utei u Myntri.
“Ngi na ka liang ka sorkar Kerala ngi la rai ban pynbna lang ha kane ka bynta bad ki nongpynïaid ka kynhun ïalehkai ka Argentina,” u la bynrap.
Haba jubab ïa ka jingkylli, u la ong ba ïa ka rai halor ka jingwan jong ka kynhun la pynkut noh bad kam don kano kano ka jingkylla ha ka.
Da kaba kdew ba ka sorkar kan buddien beit beit ïa ka jingïalehkai, ka jingpahara, bad kiwei kiwei ki jingpynbeit ha kane ka bynta, u la ong ba ïa ka jaka ïalehkai bad ka kynhun ïalehkai pyrshah yn sa rai hadien.
U la ïathuh ba ïa kane ka jingïakhun yn sa pynlong ha u snem ban wan (2025), hynrei ïa ka tarik yn sa pynbna da ka synjuk phutbol ka Argentina katkum ka rukom treikam.
Da kaba pynshai ba ïa ka jingïalehkai yn pynlong ha ka madan ïalehkai kaba lah ban ngiam ym duna ïa ka 50,000 ngut ki briew, u la pynpaw ba ka Kochi ka lah ban long ka jaka ïalehkai.
Utei u Myntri u la kdew ba ka India ka dei ka nongkyrshan kaba heh tam ïa ka kynhun ïalehkai phutbol ka Argentina, bad shi bynta na ka saw bynta ki nongkyrshan ki don ha Kerala.
