Shillong, Naiwieng 21
U Aaryavir Sehwag, u khun jong u rangïalehkai bakhraw jong ka ri India, u Virender Sehwag, u la lah ban ïoh ïa ar tylli ki spah run (double century) khlem shah pynhap wiket kaba pynlong ïa ka Delhi ban ïalehkai bha pyrshah ïa ka Meghalaya ha ka sngi kaba ar jong ka U-19 Cooch Behar Trophy Elite Group-A ha madan MCA ha Polo ha ka Sngi Palei.
Tad haduh ba kut ka sngi kaba ar, ka Delhi ka la ïoh 468 ron hadien ba ka la hap noh 2 wiket bad ba kan tam kylla da 208 ron ïa ka Meghalaya kaba la ïoh 260 ron ha ka pali nyngkong. Hangne u Aaryavir u la lah ban ïoh thik 200 ron bad la kyrshan pat ïa u da u Dhanya Nakra uba la ïoh 98 ron, katba u Arnav Bugga, u la seng ïa ka nongrim ba khlaiñ ïa la ka kynhun ban ïoh 114 ron.
Kane ka jingskhem bha ka rukom ïalehkai ki nongtied jong ka Delhi, ka la pynlong ïa u kapten ka Meghalaya u Dipankar Baruah ba un bujli ïa la ki nongkawang bol na kawei ka por sha kawei pat. Kane ruh kam shym la don jingktah eiei ïa ki nongtied ka Delhi kaba i kumba ki sngewtynnad bha ban ïalehkai ha kane ka madan.
Haba phai biang sha u Aaryavir, ym lah ban len ba dei ma u uba la lah shisha ban pynshohbiej ïa ki khmat jong nongwan peitkai ha kane ka jingïakhun, namar u da pynpaw shisha ïa ka sap ba tbit bad pnah bha ha ka liang ban tied, katno tam lei lei ban pynpaw ïa ka rukom tied (shots) ha baroh ki bynta ka madan.
Hashwa ïa kane, ka Meghalaya ha ka pali wan tied nyngkong ka la bynrap sa 21 ron na ki 239 ron na ka bynta 7 wiket ba ka la lah ban ïoh ha ka sngi kaba nyngkong. U Kshitij u la bteng ban ïoh 62 ron, katba u Angkit Tamang 29 ron.
Kumta kaba sah ka long ban peit ban khmih ba haduh katno ka Delhi kan ïoh run shwa ba kan ailad biang ïa ka Meghalaya ba kan wan tied ïa ka pali ba-ar.
