Shillong, Naiwieng 22
Ka Mawkhar SC, Pohkseh SC bad ka Mylliem SC ki la ïoh jingjop ha ka lympung ïalehkai First Division Football League 2024 ba la pynïaid da ka Shillong Sports Association (SSa) ha ka Sngi Thohdieng ha SSA Stadium, Polo.
Ha ka jingïakhun kaba nyngkong, ka Mawkhar SC ka la pynliem noh ïa ka Sohryngkham SC da 4-3 kol. U Refferfield Ryntathiang u la thep ar kol ha ka minit kaba 29 & 86, katba ïa kiwei pat la pynbud da u Edmundwell Mukhim (65) bad u Baniimen Passah (77). Na ka liang ka Sohryngkham ka la thep da u Bikitstar Nongkhlaw (21), Wallambha Kharpran (26) bad u Pynshongdor Pyngrope (67).
Ha ka jingïakhun ba ar, ka Lawsohtun SC ka la shah rem noh da 1-2 kol ha ka Pohkseh SC. Kane ka jingjop jong ka Pohkseh ka la wan urlong lyngba ka jingïarap pynthep da u rangïalehkai ka Lawsohtun u Blashan Nongkynrih (5) bad kawei pat da u Reinjoywell Wartde (9). Na ka liang ka Lawsohtun ka la lah ban pynphai kylla ha ka kylla miet lyngba u Rishankhem Nongkynrih (51).
Haba phai sha kawei pat ka jingïakhun, ka Mylliem SC ka la pynliem noh ïa ka Mawtawar lyngba ka shi kol ba la thep da u Shembhalang Langbnang ha ka minit kaba 45.
