Amlarem, Naiwieng 22
Ka Nongtalang Khlachympa, Lumpyngngad CSCC, Nongshiliang SC bad Darang SC ki la ïoh jingjop ha ka Upper bad Lower Division Football Tournament ba la pynïaid da ka Amlarem Sub Divisional Sports Association (ASSA) ha ka Sngi Thohdieng ha Mini Stadium Ladjaplem kaba ha Amlarem.
Ha ka jingïalehkai jong ka Upper Division, ka Nongtalang Khlachympa ka la pynliem ïa ka YSWC Thangbuli da 1-0 kol bad ïa kane ka kol la thep da u Balamphrang Kurkalang ha ka minit ba 35.
Ha ka Lower Division, ka Lumpyngngad CSCC ka la pynliem ïa ka Amsarim SC da 2-0 kol. Ïa kine kol la thep da u Journey Rymbai ha ka minit kaba 15 bad Welcome Syrti ha ka minit ba 19.
Haba phai sha ka jingïalehkai kaba bud, ka Nongshilliang SC ka la pynliem ïa ka ACP Padu da 1-0 kol bad ïa kane ka kol la thep da u Dekyrmen Swer 39.
Ha kawei pat ka jingïalehkai ka Darang SC ka la pynliem ïa ka Amjajer Rako SC da 2-1 kol. Ka Amjajer Rako SC ka la ïoh ban pynkhih jar nyngkong ha ka minit ka ba 32 ba la thep da u Cibilson Langshiang, katba ka Darrang SC ka la pyntam da ar kol ba la thep da u Owen Ryngksai (35) bad Stephenson Ryngksai (54).
