Beirut, Naiwieng:
Ka Lebanon ha ka Sngi Palei ka la pyntip ba ka jingleit ther bom ka Israel sha ka phang Mihngi jong katei ka ri ka la shim ia ka jingim jong 52 ngut ki mynsiem briew hapdeng ka jingleit khynra bad jing-leit hiar thma jong ka Israel ha kylleng kitei bynta.
Namar la ong ba hadien 11 bnai jong ka jingiakynad ba malu-mala hapdeng jong kine ar tylli ri, ka la wanrah syndon ia ka thma jong ka Israel pyrshah ia ka lehnoh Hezbollah jong ka Lebanon ha u Nailur jong une u snem hadien ba ka Israel ka iohi ia ka jing-ai jingkyrshan ba radbah jong ki lehnoh Hezbollah ia ka lehnoh Hamas kaba synshar hi ia ka nongbah Gaza da ki phew snem mynta. Ka tnat pathai khubor jong ka Lebanon, ka National News Agency (NNA) ka la iathuh ruh ba napdeng jong kitei kiba khlad, la kynthup ruh ia kawei ka longïing jong ki shi kurim bad 4 ngut ki khun kiba la duh ei noh ia ka jingim ha katei ka jing-leit thombor jong ka Israel sha ka shnong Maqneh. Kumjuh sa kiwei pat shi kurim bad ka khun rit ki la khlad noh napdeng ki 11 ngut kiba khlad na ka jing-leit thombor ka Israel sha ka shnong Nabha.
