Shillong, Naiwieng 24
Ka Shillong Lajong FC ka la ïasam mar shi poiñ pyrshah ïa ka Chur-chill Brothers ha ka jingïalehkai kaba nyngkong jong ka I-League 2024-25 ha la ïing kaba la long ha ka Sngi U Blei ha SSA Stadium kaba ha First Ground, Polo.
Kane jingpynïakhaid ka la wan urlong lyngba ki kol ba la thep da ki rangïalehkai na Brazil, u Douglas Tardin bad u Renan Paulino hadien ba katei ka kynhun kaba khlaiñ bor na Goa ka la thep kol nyngkong.
Kumba ka paw na katei ka jingïakhun baroh arliang mamla ki la ïakhun tyngeh naduh kaba sdang hynrei ka Churchill ka la ïoh ban pynkhih jar nyngkong eh ha ka minit kaba 14 lyngba u Wayde Lekay. Une u rangïalehkai na South Africa u la pynbud biang ïa ka kol ba ar ha ka minit kaba 21 na ka bynta ban tam da ar kol.
Hadien shiteng kynta ka Shillong Lajong hapoh ka jingïalam u Jose Hevia ka la wanphai da ka jingkhlaiñ bor na ka bynta ban pynphai kylla lyngba u Douglas Tardin ha ka minit kaba 35. Haduh kaba kut jong ka kylla step ka Churchills Brothers ka dangtam da 2-1 kol.
Hadien san minit ba la bteng ïa ka jingïakhun jong ka kylla miet ka Lajong ka la thep biang ïa ka kol kaba ar lyngba u Paulino na ka bynta ban ïakhaid mar 2-2 kol. Haduh kaba kut ka jingïalehkai kine ki kynhun kim shym la lah shuh ban thep kol biang bad ki la kut ha ka jingïakhaid.
Ka Shillong Lajong kan pyn-khreh biang sa kawei ka jingïakhun ha la ïing pyrshah ïa ka kynhun na Goa, ka Dempo SC ha ka 30 tarik mynta u bnai.
