Jowai, Naiwieng 25
U Rangdajied Sayoo bad Niponghi Sumer ki la ïoh hat-trick ha ka lympung ïalehkai Super Division Football Tournament na ka bynta U Kiang Nangbah Memorial Trophy 2024 ba la pynïaid da ka West Jaiñtia District Sports Association (WJDSA) ha ka Lah Sngi U Blei ha Kiang Nangbah Stadium, Jowai.
U Rangdajied u la thep ha ka minit kaba 10, 31 & 58 na ka bynta ban pynlong ïa ka Ladthadlaboh SC ban pynjem khnap haduh 12-0 kol ïa ka Shangpung Lumiawmushai. Ïa ki khyndai tylli ki kol ba tam jong kane ka kynhun la thep da u Sanki Langstang (21), Banteilang Shylla (25 & 53), Buromlangki Salahe (42 & 86), Medonhi Salahe (49), Samuel Phawa (76 & 77) bad u Jervisly Rymbai (84).
Ha ka jingïalehkai kaba bud, ka Nangbah Mulang ka la pynliem ïa ka 7 Wasa da 3-0 kol bad Niponghi Sumer u la thep lai kol ha ka minit 23, 26 & 31 na ka bynta ban ïa ka hat-trick.
Haba phai sha miej ïakheiñ poiñ, ka Nangbah Mulang ka dang bat ïa ka kyrdan kaba hakhlieh duh da kaba ïoh 16 poiñ. Ha ki jingïakhun ba la dep ka la jop 5 sien kynthih bad ïakhaid shisien.
Ka Ladthadlaboh, Demthring bad Wahïajer ki don mar 10 poiñ, katba ka 7 Wasa United ka la ïoh 8 poiñ, ka Mukhla Raij (5 poiñ), Shangpung Lum-iawmushai (3 poiñ). Katba ka Sailung Ïalong kam shym la lah ban ïalehkai bha ha kane ka aïom bad ka dangïai bat ïa ka nam rem.
Ka jingïalehkai ha ka Sngi Balang (27 tarik) kan long hadpeng ka Mukhla Raij pyrshah ïa ka Shangpung Lumïaw-mushai ha ka por 11 baje mynstep bad ka 7 Wasa United ïa ka Demthring ha ka por 2 baje nohphai sngi.
