Nongstoiñ, Naiwieng 25
Ka Futsal Association of West Khasi Hills District ha ka Lah Sngi U Blei ka la plie pyrda ïa ka lympung ïalehkai 1st Inter Office Futsal Tournament hapoh ka madan Leonel Futsal Arena kaba ha Pyndengrei WKHD.
Ïa katei ka lympung la plie da u Bah M.A Challam, ADC ka WKHD kum u kongsan ha ryngkat ka jingïadonlang ki nongpynïaid ïa katei ka lympung, ki kynhun ïalehkai na ki tnad sorkar bapher bapher bad kiwei kiwei.
Ha katei ka sngi sdang ïa katei ka lympung, ka kynhun ïalehkai jong ka DC Office ka la ïoh jingjop hadien ba pynliem noh da 4-3 kol ïa ka 4th MLP Sohpian.
Ki la don 16 tylli ki kynhun kiba la wan shim bynta ha kane ka lympung bad ka khusnam ka long da ka song pisa ryngkat ki trophy.
