Jowai, Naiwieng 26
Ka Chiehruphi SYWSC ka la ïoh jingjop, katba ka Rymbai Shkenshynriah SC bad Thangskai Tiger SC ki la ïasam mar shi point ha ka lympung ïalehkai Super Division Football Tournament na ka bynta ka 4th Kyrmen Shylla Contribution Trophy.
Ha kane ka lympung ba la pynïaid da ka East Jaiñtia Hills District Football Association (EJHDFA) ha ka Sngi Ba-ar ha madan Artificial Turf kaba ha Deinshynrum, ka Chiehruphi SYWSC ka la pynliem noh ïa ka Ladrymbai B SC da 4-3 kol.
Ïa ki kol jong ka Chiehruphi la thep da u Premi Muksor ha ka minit kaba 17, kumjuh u Meshanki Sympli (24 &45+4) bad u Sandy Kasar (56). Katba ka Ladrymbai ka la lah ban pynphai kylla lyngba u Laxman Lamare (34), Christopher Dkhar (78) bad kawei pat la ïarap pynthep da ka liang pyrshah lyngba u Meshanki Sympli ha ka minit ba 82.
Haba phai sha kawei pat ka jingïalehkai kaba bud hapdeng ka Rymbai Shkenshynriah SC bad Thangskai Tiger SC ki la ïakhaid mar 1-1 kol. Ka Rymbai ka la pynkhih jar nyngkong eh tang mar ïasdang ka jingïalehkai lyngba u Ribiang Dkhar ha ka minit kaba 3, hynrei hadien shiteng kynta ka Thangskai ka la lah ban pynïakhaid kylla lyngba u Pynthymme Rymbai ha ka minit ba 38.
