Shillong, Naiwieng 26
Ka shnong Mawlaingut ka la pynkup burom ïa ki ar ngut ‘thei ïalehkai kiba la wanrah burom da kaba ïoh khur ïa ki takma ksiar ha ka National Kickboxing Championship 2024 kaba la long ha Kozhikode, Kerala naduh 14 haduh 17 tarik u Naiwieng 2024.
Kine ki kynthup ïa ka Rinehskhem Nongbsap ha Junior Point Fight (45kg) bad ka Amegrace Nongbsap ha ka Sub-Junior. Ïa ka jingpdiang burom ïa kine ki khynnah la pynlong ha ka 22 tarik u Naiwieng 2024 ha kaba la ïoh jingkren na ka Seng Longkmie da ka Kong Hilin Nongbsap, Seng Samla da u Bah Jockeystar Pathaw bad na ka shnong da u Bah Saindorlang Nongbsap.
Na ka liang ka shnong Mawlaingut ka ai khublei ruh ïa u Bah Samuel Hashah kum u nongïalam ka All Meghalaya Kickboxing Association (AMKA), kumjuh ïa u Bah Goverius Mylliem Umlong kum u ksiang ha ka dong ka thaiñ Diengiei lem bad ïa ka St. Therisa Secondary School Mawlaingut.
