Shillong, Naiwieng 27
Ka Nangkiew Irat SC kaba don ha ka kyrdan shatrai, ka la wanphai da ka jingkhlaiñ bor ha ka OC Blue Shillong Premier League 2024 na ka bynta ban pynliem noh ïa ka Shillong Lajong FC da 2-1 kol ha ka Sngi Balang.
Kane ka jingshah rem jong ka Lajong ka la pynlong ban duh noh ïa ka kyrdan nyngkong ha ka Mawlai SC kaba dei ka lahduh mynshem snem kaba la jop da 3-0 kol ïa ka Nongrim Hills SC ha kane kajuh hi ka sngi.
Ha kawei pat ka liang ka Rangdajied United FC ka la lah ban pynliem ïa ka Laitkor SC da 3-0 kol na ka bynta ban kiew sha ka kyrdan balai.
Kumba ka long mynta ka Mawlai ka la tam da 3 point ïa ka Lajong (13 la 10 point), katba ka RUFC ka la don mynta 9 hadien ba kam shym la lah ban ïalehkai bha ha kaba sdang jong kane ka lympung.
U nongapkol ka Lajong, u Siwel Rymbai, um shym la lah ban ïakhun bha ban pashat bol bad kata ka la ailad ïa ka Nangkiew Irat, kaba la shah rem lai sien na ki saw tylli ki jingïalehkai ba nyngkong jong ka, ba kan lah ban pynkhih jar nyngkong lyngba u Damehun Syih (12). U Deibormame Tongper (31) u la thep ïa ka kol ban pynïakhaid lyngba ka jingshut jong u Kynsaibor Lhuid, pynban, kine ki ar tylli ki kynhun ki la poi sha ka jingïakhaid da mar 1-1 kol.
Ka jingïakhaid kan jin da la long ka jingjop kaba bha na ka bynta ka Nangkiew Irat bad ki la peit kumba kin pynhun ïa kata ha ka kylla miet, katba ka Lajong pat ka la nang kham sngewrem. Haba u rangïalehkai ba kongsan jong ka, u Wanlamsuk Nongkhlaw um shym la lah ban ïalehkai namar ka jingshah sospon, ka Nangkiew Irat ka la donkam ïa uwei pat uba wan shakhmat bad u Jefferson Pakynteiñ u la thep kol ha ka minit kaba 88 ban ai ïa ka kynhun jong u ïa ka jingjop ka ban pynkynmaw.
Hadien kata, ka jingthep kol da u Owanijuh Pajuh (48 & 56) bad ka jingphai lyngba penalty da u Manbhakupar Ïawphniaw (63) ka la pynlong ïa ka Rangdajied ban khur ïa ka jingjop ha ka sien kaba lai sien.
Ha ka jingshisha dei ka Laitkor kaba la pyrkhat ba kan ïoh thep kol, hynrei u Fridison Wanñiang u la shah kheiñ ba ka dei ka offside. Watla ka Laitkor ka la ïashan tyngeh, hynrei ka RUFC kam shym la lah ban thep kol ha ka kylla step. Te kumta ka Rangdajied ka la lah ban pynurlong ha ka kylla miet na ka bynta ban khur syndon ïa ka jingjop.
Haba phai sha kawei pat ka jingïakhun, ka Nongrim Hills ka la pyni ïa ka jingïalehkai bha hynrei kam shym la lah ban thep kol. Kumjuh ka Mawlai kam shym la lah ban pynurlong ha ka kylla step, hynrei dei ha ka kylla miet ba ka la lah ban pynurlong lyngba u Kevin Rymbai (55), kumjuh u Dibinroy Nongspung (82) bad u Overkindness L Mawnai (88). U Donlad Diengdoh u la lah ban ïarap pynbuh bol na ka bynta u Kevin bad u Dibinroy.
Ka jingïalehkai ha ka Sngi Palei kan long hapdeng ka Ryntih FC pyrshah ïa ka Sawmer SC ha ka por 5:30 janmiet.
