Mumbai, Naiwieng:
Ka Delhi, ka la ïoh ïa ka jingkhriat tasam ha kane ka aïom, haduh mynta, namar ba ka jingshit, ka la hiar sha ka 10.1 Degree Celsius, hynnin ka sngi, la ïathuh ka khubor kaba la wan na ka tnat IMD. Ka jingïoh lum jingthew kaba khatduh eh ha ka jingïoh ïa ka jingkhriat ha shwa haduh hynnin ka sngi ka la long da 10.2 Degree Celsius kane ka la long ha ka 21 tarik u Naiwieng.
Ka nongbah ka la sakhi ïa ka jinghiar jong ka jingshit kaba jur ha kine ki khyndiat sngi ba la dep katba ki lyer khriat na shaphang Shatei-lam-Sepngi ki la nang jur ha ka jingbeh. Ka jingkheiñ jong ka IMD ka pyni ba ka jingshit kaba duna tam ka lah ban nang hiar shuh shuh, kaba lah ban poi sha ka 10 Degree ha kane ka sngi.
Ka jingjaboh jong ka lyer ha Delhi ka la kiew khyndiat hynnin ka step, ha kaba ka jinglong ka lyer ka dang sah ha ka kyrdan ‘ba sniew bha’, la ïathuh ki heh sorkar. Katkum ka jingkheiñ na ka Central Pollution Control Board (CPCB), ka lyer ka long 313 ha ka por 9 baje mynstep, kaba la kiew na ka 301 kaba la ïoh jingtip ha kajuh ka por ha ka sngi Balang.
