Chennai, Nailur:
Ki la don haduh 38 ngut ki khynnah skul ki la shah sumar bad shah pyllait hadien ba la kynnoh ba la lap ïa ka ñiangbshiah ha ka jingbam step ba la ai ha Kottaiyur Panchayat Union Middle School ha Tiruvallur distrik ha ka sngi Palei. Kine ki khynnah skul kiba la ujor ba ki don ka jingking khlieh hadien ba ki la bam ïa katei ka jingbam, la pynkit noh sha Tiruvallur Government Medical College Hospital ban ïoh ïa ka jingsumar bad ban peit bniah.
Hadien katei ka jingjia, u nongpeit nongkhmih jong ka Tiruvallur, u S Kavitha, u la shim ïa ka sienjam pyrshah ïa kitei ki arngut ki nongshet jingshet kiba donkti bad u la pyllait ïa ki na ka kam.
Ka la hukum ruh ban pynshitom ïa u nongpynïaid skul, uwei u nonghikai bad u ophisar pynroi block.
Katkum ka jingïathuh jong ki heh jong ka tnad pule puthi jong ki skul, ki don 54 ngut ki khynnah skul naduh klas 1 haduh 8 kiba don ha katei ka skul.
Hadien ba 38 ngut ki khynnah skul ki la ujor ba ki don ka jingkynjah, ki nonghikai ki la peit bniah ïa ki jingbam bad la kynnoh ba ki la lap ïa ka ñiangbshiah ne ki bynta jong ka ha u khiew jingbam. Ïa ki khynnah pule kiba dang sah la ai da kiwei pat ki jingbam, katba ïa ki khynnah pule kiba shah ktah la pynkit sha hospital.
Arngut ki khun Anganwadi jong ki nongtrei kiba donkti ban shet ïa ki jingbam ruh ki dei napdeng kiba la shah rah sha katei ka jaka sumar. Baroh ki khynnah pule la pyllait noh hadien ba la dep sumar bad la phah noh sha la ïing, la ïathuh ki heh sorkar. Ka jaka shet jingshet ka don ha kawei ka phyllaw ha kaba la ngeit ba ka ñiang bshiah la hap ha ka jingbam.
La bthah ïa ki bor pynïaid skul ban pynkhuid bha ïa ka kamra shet, ban pynduh ïa ki khñiang bad ban ai rong ïa ka jaka, la bynrap shuh shuh ki heh sorkar.
Ki heh jong ka tnad pule puthi jong ka distrik ki la bthah ruh ïa ki nonghikai ba kin dih ïa ki jingbam shwa ban ai sha ki khynnah skul bad ban pynthikna ba kan don ka jingïapher kaba 30 minit hapdeng u nonghikai uba bam ïa ki jingbam bad ba la ai ïa ki khynnah skul.
Ki heh sorkar ki la ong ba watla la bud ïa kane ka rukom ha ki katto katne ki skul, hynrei kam long kaba ïadei dur ha kylleng ki skul.
