Bhubaneswar, Nailur:
Da kaba buh da ki spah tylli ki CCTV ha ki thanat bad ki jaka sah ba sahkut khlem treikam, ki Pulit jong ka Odisha ki la pan jingpyllait na ka sorkar haduh T.76 klur na ka bynta ban pynbha bad maramot ïa ki. Ïa kane ka pisa la buh kyrpang na ka bynta ka kor peitngor CCTV hynrei la aiti noh ha u snem mang tyngka 2025-26.
Ha ka shithi sha ka tnad kam pohïing, u symbud Myntri Rangbah ba kyrpang, u ADG (Law and Order) u Sanjay Kumar u la pan ïa ka jingïalang kaba hakhliehduh ban ïa pyrkhat ïa kane ka kam bad ban pyrkhat ïa ka jingpyllait ïa ka pisa kaba kot sha ka T.76 klur hapoh ka mang tyngka ba la pyndap na ka bynta ban siew shakhmat sha ka Odisha Computer Application Centre (OCAC) na ka bynta ka jingbuh bad pynbiang ïa ka CCTV System.
Ki tyllong khubor ba thikna ki ïathuh ba la buh ïa ki CCTV ha ki 645 tylli ki thanat bad 263 tylli ki Police Outpost ha kylleng ka jylla.
Ha ka jingïakynduh jong ki heh jong ki pulit bad ki heh ka tnad Home department ha kaba sdang jong u bnai Lber mynta u snem, la kyrpad ïa ka OCAC ban pynthikna ba ki CCTV ba la buh ha baroh ki Police Station bad Outpost jong ka jylla kin dang treikam pura.
Hynrei, haduh 795 tylli ki CCTV ha ki thanat pulit bad 33 tylli ha ki jaka sah ba shabar la lap ba ki la jah rngai haduh ka 17 tarik u Nailur. Katkum ki kyndon jong ka ïingbishar ba hakhliehduh, ki CCTV ki dei ban long kiba treikam pura baroh shisngi.
U Kumar u la kyntu ïa u Additional Chief Secretary ban ai ïa ki jingbthah kiba donkam sha ka OCAC na ka bynta ban pynbha noh mardor ïa baroh ki CCTV bym treikam kiba la buh ha ki Police Station bad ki Outpost ha ka jylla.
Ka Orissa High Court kham mynshwa ka la bthah ruh ïa ka sorkar jylla ban buh CCTV ha baroh ki Police Station bad ki outpost. Ïa kane ka jingbthah la pynmih hadien ba la kynnoh ba la pynshitom beiñ ïa uwei u ophisar shipai bad ka samla jong u ha thanat Bharatpur hangne ha u bnai Naiwieng, 2024.
Ka High Court ka la hukum ba baroh ki Police Station bad ki Police Outpost ha ka jylla ki dei ban pyndap pura da ki CCTV kiba la buh bha bad kiba la buh ha ka jaka kaba biang hapoh u bnai Lber 2025. Hynrei ym pat lah ban pynthikna haduh mynta, la ong ki tyllong khubor.
