New Delhi, Naiwieng:
Ka Sorkar India, ka la pynpaw hynnin ka sngi ha Parliament, ba haduh ka 1 tarik, Naitung, 2024, ki la don kumba 211 ngut ki nongtong dohkha na India kiba dang sahkut ha ki patok jong ka Pakistan bad 139 ngut ki dei na Gujarat. Ïa kane ka mat, la pynpaw paidbah, da u MP ka seng Congress, u Shaktisinh Gohil, uba la pynpaw ïa ka jingsngewkhia kaba jur, halor ka jingbit jingbiang jong kitei ki nongtong dohkha bad ki bahaïing jong ki, kiba la sah ha ka umdum, na ka daw jong ka jingbym phah ïa ka jingpyntip, kaba la pyntreikam da ka Pakistan.
U Gohil u la pynpaw ba ha ka por jong ka sorkar UPA, ka jingthoh lyngba ki post ka ailad ïa ki longïing ban ïoh ïa ki jingtip bathymmai shaphang ka bha ka miat jong ki nongtong dohkha, hynrei naduh kata ka por kane ka rukom leh ka la sangeh noh namar ba ka Pakistan ka la sangeh ban wanrah ïa kum kane ka jingïakren.
U Gohil u la kyntu ïa ka sorkar ban shim khia mardor ïa ki sienjam ban pynthikna ba wat haba ki nongtong dohkha ki ïaid lait ïa u pud u sam duriaw da kaba bakla, ïa ka jingbishar jong ki la dei ban pynlong ha ka por kaba biang bad ban pynsted ïa ka jingpynphai biang ïa ki sha la ka ri.
