Washington, Nohprah
U President ba dang shah jied shen ka America, u Donald Trump, u la jied ïa u Kashyap Patel ne u “Kash” kum u Director jong ka Federal Bureau of Investigation (FBI) ka ban pynlong ïa une nong India-Amerika ba ar ban rung sha ka kynhun Myntri jong U Trump. Haba pynbna ïa kane ka rai halor ka Truth Social, u Trump u la ai ka jingïaroh ïa u Kash Patel kum u “nongïasaid aiñ ba stad” bad u nongïasaid aiñ jong u “ka jingïapyrkhat ba nyng-kong jong ka America”. Ka jingshah jied jong u Patel ka pyni ïa ka jingkylla kaba khraw ha ka jinglong nongïalam ha ka FBI kaba pynpaw ïa ka jingthmu jong u Trump ban pynkylla ïa ki tnad pynjari aiñ jong ka US ban pynïadei bad ki jingthmu ba kongsan jong u bad ban weng ïa ka jingbamsap kaba don hapoh ka ri.
U Kash Patel, 44 snem ka rta, u dei u nongïasaid aiñ uba la tbit bha bad u nongmudui barim, uba don ka nam kaba la pynmih ïa ki jingïakren. La kha ïa u Kash Patel na ki kmie ki kpa kiba wan buhai shnong na India, u la tei ïa ka kam kaba pawnam ha ka liang ka aiñ bad ka saiñ hima sima shwa ba un rung sha ka kam ba kham halor jong ka ri. U Patel u la shakri kum u nongïada paidbah bad hadien kum u nongmudui ha ka tnad jong ka the Department of Justice (DOJ), ha kaba u la pynïaid ïa palat 60 tylli ki jingbishar. Ka jingïaid lynti jong u ha ka kam ka la kylla hadien ba u la ïasoh bad ka sorkar u Trump bad bat katto-katne ki kam ba kongsan.
Ha u snem 2017, u Patel u la trei kum u nongïasaid aiñ ba rangbah jong u Nongmihkhmat u Devin Nunes ha ka por ba ka House Intelligence Committee ka la pynlong ïa ka jingtohkit ba kulmar jingmut halor ka jingtoh-kit jong ka FBI halor ka jingwan tuklar jong ka Russia ha ka elekshon 2016. Ha u snem 2018, u la rung sha ka Dorbar Pahara jong ka Ri kum u Nongïalam Rangbah na ka bynta kam Pyrshah ïa ki lehnoh bad ha kaba la kyntiew kyrdan ruh ïa u sha ka kyrdan Heh Shipai kumjuh sha u Myntri Shipai ba shipor jong u Christopher Miller ha ki bnai khatduh jong u Trump ha ka kam.
U Kash Patel, uba la pawnam na ka bynta ka jingnang ban pyrshah jong u, ïa ka FBI bad ka Justice Department, ha kaba bunsien u ju kynnoh ïa ki, ba ki dei ki kam bamsap. Ha ka kot jong u, u la batai ïa ka FBI kum kaba “Shu ïamynjur lang” bad kaba donkam ïa ka jingpynkylla kaba jur. U la kyrshan ruh ban pynduh noh ïa ki kot ki sla sorkar kiba kongsan bad ban pynthymmai ïa ki kyndon pahara.
