Shillong, Nohprah 04
Ka East Khasi Hills District Athletics Association (EKHDAA) kan pynlong ïa ka jingpyrshang na ka bynta ban jied ïa ki nongïalehkai athletics ki ban mihkhmat ïa ka East Khasi Hills District sha ka 6th Meghalaya Games 2025 ka ban long ha Jowai naduh 21 haduh 24 tarik u Kyllalyngkot 2025.
Ïa katei ka prokram jied nongïalehkai yn pynlong ha ka 7 tarik mynta u bnai ha SAI, STC, Shillong kaba don ha N.E.H.U. naduh ka por 8 baje mynstep.
Kat kum ka kyrwoh ba la pyllait da u Bah Kyrshanbok Marbaniang, General Secretary ka EKHDAA, la ong ba ka jingpynrung kyrteng na ka bynta ki nongïalehkai ha katei ka jaka na ka bynta tang ar tylli ki jingïalehkai bad ka jingsam ïa ki chest number kan long ha ka 7 tarik.
Ki jingïalehkai ha ka Under – 22 Years Men ka long 100M, 200M, 400M, 800M, 1500M, Long Jump, High Jump, Javelin Throw (800gm), 4 X 100M Relay bad ka 4 X 400M Mixed. Ha ka Under – 22 Years Women ki long ka 100M, 200M, 400M, 800M, 1500M, Long Jump, High Jump, Javelin Throw (600gm), 4 X 100M Relay bad ka 4 X 400M Mixed. Ha ka Under – 30 Years Men ki long ka 5000M & 10000M, katba ha ka liang ki kynthei (U- 30 Years Women) ki long ka 3000M & 5000M.
Ki nongïalehkai ki dei ban wanrah lang ïa ki kot ki sla ban pynshisha ïa ka snem kha ba la ïoh na Municipality/CHC/PHC/Nagar Palika/District Headquarter bad kiwei kiwei. La bthah ruh ïa baroh ki nongwan ïashim bynta ba kin hap ban wanrah la ki jong tiar ïalehkai, ka bam ka dih bad kiwei ki jingdonkam.
