Khliehriat, Nohprah 06
Napdeng 168 ngut ki khynnah shynrang Under-17, la jied tang 25 ngut ban mihkhmat ïa ka East Jaiñtia Hills District sha ka Meghalaya Games 2025 ka ban long ha Jowai-Wahïajer, West Jaiñtia Hills District.
Ïa kine 25 ngut ki khynnah la jied hadien ba ki la pyndep ïa ka Trial ne ka jingpyrshang ba la pynlong da ka East Jaiñtia Hills District Football Association (EJHDFA) ha madan Artificial Turf, Diengshynrum ha ka 5 tarik Nohprah.
Ha kane ka jingpyrshang la hikai pyntbit ïa ki khynnah da ki saw ngut ki nonghikai ne Coach kiba napoh ka District ba kynthup u Ma Comingone joy Tlang (C-license), Ma Joshua Sajem (D-license), Ma Present Bareh (D-license) bad Ma Heplang Bareh (D-license).
Ka EJHDFA lyngba u General Secretary Ma James Sutnga, ka ai khublei kyrpang ïa baroh ki khynnah kiba la wan shim bynta ha kane ka jingpyrshang bad kitbok kitrwiang ruh ïa ki 25 ngut ki khynnah ki ban mihkhmat ïa ka District sha ka lympung ïalehkai ba heh jong ka jylla.
