Cuba, Nohprah:
Ki bor pynïaid ka Cuba ki la pyntip ba ki la sdang ban pynbha biang ia ki shlem sam bording hadien ba ki la khyllem bad sangeh treikam noh ha kine ki khyndiat sngi ba la leit, ha kaba ki paidbah nongshong shnong ki la hap ban shu shong dum bad ka la wanrah ruh ia ka jingeh kaba khraw ia ki paidbah khamtam ha kum kine ki sngi ba baroh ki kam- ki jam ki ïaid kam tang da ka lait.
Kumta, u Myntri ka tnat bor-ding jong ka Cuba, u Vicente de la O’Levy u la ong ba ka sorkar ka la ialeh ban pynbit-pynbiang shuwa nyngkong eh ia ki jaka sumar bad ki jaka sam ubam- umdih bad hadien kata pat yn sa pynbiang ia ki paidbah nongshong shnong baroh lang.
Hynrei la ong ba kiba bun hi pat ki paidbah nongshong shnong ka Cuba kiba don ha kylleng jong katei ka ri dew lynnong, ki dang shong khlem bor-ding tad haduh ka Sngi Balang.
Shuh shuh ruh la ong ba ka sorkar Cuba ka la kyntu ia kito ki skul bad ki nongtrei kam shimet ba kin iai shah bad kin shong iing shwa shi por katba ka sorkar ka dang ialeh shitom ban pynbiang ia ka bording.
U Myntri ka tnat bor-ding ruh u la pynpaw ba u ngeit skhem ba baroh- kiei-kiei kin ïaid beit- ïaid ryntih noh naduh ka Sngi Palei namar u la ong ba ka ri ka don ia ki riewshemphang bad baroh ki dang iatrei lang ha kane ka por ban pynbha biang ia kitei ki kor treikam ban pynmih bording ha ka por kaba khyndiat eh.
Namar la ong ba ki shlem sam bording ka Cuba ki la sangeh treikam noh hadien ka jingkyrduh umphniang, ka jingpynthut ki bor ka mariang bad ka jinghiar ha ka ioh-ka kot jong katei ka ri, kaba la pynlong ia ki paidbah nongshong shnong ba kin hap ban mad ia kane ka jingeh ha kane ka sien.
Ki jaka pynmih bording ba pyndonkam da ka umphniang ha katei ka ïew, kiba la rim bad kiba dang ïaleh ban pynmeh ïa ki light, ki la poi sha ka jingeh kaba pura mynta u snem namar ba ka jingwanrah umphniang na Venezuela, Russia bad Mexico ka la nang hiar, kaba la pynlong ïa ki jingpynlip bording bunsien ha baroh kawei ka ri ha kine ar bnai mynta.
Ka jingduna ha ka bam ka dih, ki dawai, ka um bad ka bording ka la nang wanrah jingeh shuh- shuh ia kiba bun ki nong Cuba, kiba la phet krad na katei ka ïew ha ka jingbun briew kaba la pynpra ïa ka rekod ha kine ki lai snem ba la dep.
Ka Cuba ka kynnoh ba dei ki jingpynjari jong ka U.S., kiba la wanrah jingjynjar ïa ka liang ka khaii- pateng bad ka jingthied umphniang ha katei ka ri.
Hynrei la ong ba ka jingduh bording ha ka step jong ka Sngi Balang ruh ka dei namar ka jingthut jong ka jaka pynmih bording jong ka Antonio Guiteras ha Matanzas, kaba dei ka jaka pynmih bording kaba heh tam ha katei ka ïew, kaba la khang noh ha ka por kumba 2 baje mynstep.
Wat la katta, la ong ba da ki million ngut ki briew ha kylleng ka Cuba ki la dep sakhi ïa ka jingpynlip bording kaba la neh da ki kynta man ka sngi shwa ka jingtwa jong katei ka shlem sam bor-ding ha ka Sngi Balang.
