Kyiv, Nohprah:
U President ka Ukraine, Volodymyr Zelensky, ha ka Sngi Ba-ar u la pynpaw ka sngewnguh kaba khraw ia ka jingkut jingmut kaba skhem jong u Donald Trump ban pynkut noh ia ka thma ha Ukraine, hadien ba u la iakynduh ia u President ban sa long jong ka US ha Paris ha ka taiew ba la dep.
U President jong ka France, Emmanuel Macron, u la pynlong ïa ka jingïakren kaba lai liang bad u Zelensky bad u Trump ha Elysee Palace ha ka sngi Saitjaiñ, katba ka jingsheptieng, ka nang kiew ha Ukraine halor ka kyrdan jong ka jingkyrshan kaba ka Ukraine kan ïoh hapoh ka jingsynshar ba dang wan jong ka US.
Namar la ong ba kane ka mat ka long kaba khluit bha ha kane ka por namar ka dei ka thma Ukraine kaba la sdang nyngkong eh ha shwa ka jingiakynad jong kiwei pat ki ri ha kane ka juk mynta.
Kumta ha katei ka sngi u Zelensky u la ai khublei kyrpang bad ka jingsngewnguh kyrpang ïa u President Macron uba la pynlong ïa ki jingiakren ban wanrah jingsuk noh haba iadei bad ka thma ha Ukraine kumjuh ruh ïa u President Donald Trump na ka bynta ka jingkut jingmut kaba skhem jong u ban pyniasuk ia ka Russia bad Ukraine bad ban pynkut noh ia ka thma ynda u la don ha ka bor.
Namar u Trump naduh ka por ba u dang ialap ilekshon na ka bynta ka ilekshon President ha une u snem, u la dep kular lypa tang mar ia ioh ban don ha ka bor, un pynkut noh ia ka thma jong ka Russia bad Ukraine tang hapoh 24 kynta ba u la ioh ban synshar hi ia ka US. Hynrei ka Ukraine pat ka dap da ka jingsyier bad jingsheptieng lada katei ka por kan poi namar ka sheptieng ioh u Trump un ailad ia ka Russia ban long trai noh ia kito ki bynta kiba ka la dep kurup na ka Ukraine baroh tang ban lah pynkut noh ia katei ka thma.
U Zelensky, u la kyntait ruh ïa ki jingkhot ban pynhiar ïa ka rta ban rung shipai hadien ba la mih ki khubor, ba ki heh jong ka US, ki kwah ba ka Ukraine kan pynïar ïa ka tnat shipai jong ka Ukraine kiba la don ha ka rta kaba la bit ban rung kam shipai bad ban iasnoh kti lang noh na ka bynta ban ïakhun ia ka thma pyrshah ia ka Russia.
Namarkata, ka US ka la ia jingmut ia ka Ukraine ba kan pynhiar noh ia ka rta ban thep kam shipai ia ki samla shynrang hapoh ka ri, khnang ban lah ban pyniar ia ka tnat ïada jong ka Ukraine ba kan lah ban ïakhun pyrshah ia ka Russia ha kane ka thma.
