Yemen, Nailur:
Ka jinghiar thma jong ka Saudi ha ka nongbah Mokha kaba don ïa ka Kad liengsuiñ kaba kongsan bha ha ka duriaw Red Sea, ka la shim ïa ka jingim jong 6 ngut ki briew bad 8 ngut ruh kiba la mynsaw ha katei ka sngi, katkum ki kaiphod jong ka tnat pathai khubor kaba ïadei bad ka Houthi, ka Saba, ha ka Sngi Ba-ar.
Ka kynhun lehnoh Houthi jong ka Yemen kaba ju ioh jingkyrshan na ka Iran, ka la pynlong ïa ka jinghiar thma ha kine ki taiew ba ladep ban shimti ïa baroh kawei ka rud duriaw Red Sea jong ka Yemen, kynthup ïa ka Mokha, kaba la pynlong ïa ka sorkar ba la kyrshan da ka Saudi Arabia, ba kan ai da ka jubab kaba biang.
“Hynriew ngut ki riew paidbah, kiba kynthup ïa arngut ki khynnah bad kawei ka kynthei, ki la iap bad 8ngut kiwei pat, kiba kynthup ïa uwei u khynnah bad kawei ka kynthei, ki la mynsaw, ha ki jinghiar thma liengsuin jong ki kynhun synrop, ba la ialam da ka Saudi, ha Mokha”, la ong u Saba.
U khlieh duh jong ka kynhun synshar jong ka Yemen, u Rashad al-Alimi, u la ïakren bad u President jong ka America, U Donald Trump, na ka bynta ban kyrpad ïa ka jingkyrshan jong ka America, pyrshah ïa ki riew ïaleh kiba kyrshan ïa ka Iran, ong ka tyllong khubor na ka ophis jong U Alimi, ha ka AFP ha ka sngi Nyngkong.
U Trump um shym la kular ban kyrshan shipai, la ong ka tyllong khubor, da kaba bynrap ba katei ka jingkhot ka la jia ha ka sngi U Blei bad la thmu kum ka jingpyni ïa ka jingiatylli bad ka sorkar Yemen kaba la shah pyndik.
Ki lad pathai khubor jong ka America, ki iathuh ba U Syiem Saudi, U Mohammed Bin Salman, ula kyntu ruh ïa U Trump, ba un thombor ïa ki Houthi.
U Andy Burnham, myntri rangbah duh jong ka ri Bilat, ula mynjur ban ai jingkyrshan shipai ïa ka Saudi Arabia, ong ka khubor ha ka sngi Nyngkong.
Ki jingïohnong ba la ïoh da ki Houthi jong ka Yemen ki la pynskhem ïa ka Iran bad ki paralok jong ka ban bat ïa ki ar tylli ki lynti um ba kongsan, kynthup ïa ka Strait Hormuz, kaba ka Gulf kaba kham heh bad ka Saudi Arabia kaba shalan umphniang ba ha khlieh duh ka shaniah ban shalan ïa ka umphniang jong ka.
Ka thma ha Middle East ka la sdang naduh ka 28 tarik February da ka jinghiar thma jong ka US bad ka Israel ïa ka Iran, hadien kane ka ri Islamic ka la jubab da ki jinghiar thma ha kylleng kane ka thaiñ.
Ki kynhun kiba la kyrshan da ka Iran kiba kynthup ïa ki Houthi ha Yemen bad ka Hezbollah ha Lebanon ruh hadien ki la ïadon bynta lang.
Ka thma ha Yemen kaba duk, kaba la sdang naduh u snem 2014, da ka jingïoh knieh jong ki Houthi ïa ka nongbah Sanaa, ka la sahkut bha naduh u snem 2022 hynrei ka la sdang biang ha u bnai Jylliew.
Ka Saudi Arabia ka la ïalam ïa ka kynhun synrop kaba kyrshan ïa ka sorkar ba la ithuh da ka pyrthei naduh u snem 2015. Ka jingwan tuklar jong ka, ka la pynjur ïa ka thma, kaba la pynmih ïa kawei na ki jingeh ba shyrkhei tam ha ka pyrthei.
