Washington, Nailur:
U Treasury Secretary jong ka US, u Scott Bessent, ula maham ha ka sngi Nyngkong, ba ki kompeni liengsuiñ jong ka Iran, kin shem jingeh ban treikam ha ka pyrthei, ha ki ar sngi hapoh ka jingkhia jong ki jingpynjari kyndon jong ka America — namar ba ka sorkar Trump, ka dang pyrshang ban pynbor ïa ka Iran.
Ha ka 23 tarik u Nailur, “baroh ki kompeni liengsuin jong ka Iran kin khang lut ha kylleng ka pyrthei,” ong u Bessent ha ka jingiakren bad ka CNBC.
“Lada ki hiar, phim lah ban pynbiang ïa ki da ka umphniang, phim lah ban ai ïa ki jingshakri ban hiar, phim lah ban die tiket ïa ki lane phin sa shah beh noh na ka rukom pyniaid dollar,” u la bynrap.
Ka America bad ka Iran, ki la don ha ka thma, naduh kaba kut jong u bnai February, ha kaba ki jinghiar thma jong ka US bad Israel, ki la pyniap ïa u nongialam ba ha khlieh duh jong ka Islamic republic bad ki heh shipai ha ka jingsdang jong ka jinghiar thma kaba heh.
Ka Iran ka la pyrshah da kaba khang ïa ka wahbah Hormuz, ka lynti um kaba kongsan bha na ka bynta ban pynïaid ïa ka bor ding, kaba la pynlong ïa ka dor jong ka umphniang ha ka pyrthei ban kiew katba ka jingïakynad ka nang pur ha ka thaiñ Middle East.
Ha kaba sdang jong une u bnai, ka America ka la pynjari da ki jingpynjari pyrshah ïa “baroh ki kompeni liengsuin jong ka Iran kiba dang sah” kiba dang hap ban mad ïa kum kine ki jingpynshitom.
Ka tnat pla tyngka ka la shim ruh ïa ka thong ban kyrshan ïa ka tnat liengsuin jong ka Iran, kynthup ïa ki kompeni kiba don shabar jong ka Iran.
U Bessent mynshwa u la kular ba ka America kan pynbna ïa ka “D-Day jong ka ioh ka kot” halor ka Iran bad u la kular ban pynduhjait ïa ka Iran ha ka liang ka pisa tyngka.
Kane ka jingkren jong u Bessent ka la wan shisngi hadien ba u la ïakynduh ïa u Vice Premier jong ka China u He Lifeng na ka bynta ka jingïakren ha ka liang ka ioh ka kot kaba buh ïa ka nongrim na ka bynta ka jingïalang jong u President Donald Trump mynta ka sngi Thohdieng bad u Xi Jinping u nongïalam jong ka China.
